Wir Ludwig vnd Fridrich grauen von Otting landgrauen in Elsasen veriechen vnd tu^en kund allen den, die disn prief sechnnt oder hornt, das wir vollen gewallt haben von vnserm lieben sweher vnd brueder Graf hainreichen vonn Schawnberg vnd allen sein Eriben, was wir des guts losen in der gunst es sey vil oder wenig, das wir das wol getu^en mu^egen mit der beschaidenhaitt, das die vnser lieber swecher vnd brueder vnd sein Eriben von vnns widerkawffen mugen, wann sy wellen, vmb als vil phenning, als wir darumb geben haben vmb den Heiratt von vnser Kinder wegen. Wir mu^egen auch gelosen von dem von Nyfen, was im ze taill gefallen ist der herrschaft vnd der gutter ze Hochentruhendingen mit seinem willen vnd aller seiner Eriben mit dem geding, das er vnd sein Eriben auch gewallt haben dieselben gutter wider ze kawffen vmb als vil phenning, als wir darumb geben haben, in allem dem rechten, als hie vorgeschriben stett, nach getrewer wisung, wan er vns des sein offen brief geben hatt vnd vns das fu^er sich vnd all sein Erben erlawbt hatt. Daruber ze urkund geben wir in disen brief versigelt mit vnserm Insigl, der geben ist ze Spilberig, da man zallt von kristi gepurd drewzechenhundertt Jar vnd in dem virtzigisten Jar an dem sambstag vor vnser frawn tag, als sy ze himl fur.

Source Fulltext: OÖUB 6 (Wien 1972), S. 344, Nr. 338