Ich wolcher der Trechsselhaimer uergich offenbar an disem brief allen den, die jn sehent oder hornt lesen, daz mir herr ortolf der Tu^effenbeck pfarrer zu Mawrkirchen lassen hat einen garten vnd ein pu^ent ze piburck, die zu dem selben goczhauss geho^ernt, vnd hat sew egepawn der spa^et, dem got genad, zu der widem vnd schol ich darauff pawn ein haus vnd ander zimmer, des mir not ist, vnd wenn ich von dann var, wo das hin ist, so ist das selbig haus vnd zimmer an alles gefar vnser frawn ze Mawrkirchen mir vnd mein voruodern ein selgera^et, wa^er das, das ich dem vorgenanten hern Ortolfen oder wer pfarrer noch im wirdt, da nicht fu^egt, der sol mir das sagen ze stifftum zeit, so sol ich denn den garten vnd pewnt wider antwurten, als ichs funden han, an alle widerred vnd ob er icht mer liess daselben, das sol ich uerdienen mit sampt dem garten vnd der pewnt mit aller der vodrung, vnd da von geho^ert in all dem rechten, als vor uerschriben stet, vnd seyd ich nicht aygens jnsigels han, verpint ich mich diser sach in zefu^ern an disem brieff vnder meins herrn jnsigel herrn wernhardt des Grans, der geben ist zu Maurkirchen des suntags vor sand Marteins tag nach Cristi gepurdt Anno domini M° CCC° XL.

Source Fulltext: OÖUB 6 (Wien 1972), S. 353, Nr. 348