Ich Eberhart von Waltse Houbptman ob der Ens Tv^en chunt,. Daz mich Graf Hainrich von Schownberch hat angesprochen von seinen begen Vnd von seiner Bruder begen in offener Schrann Vmb daz Hows ze Wrewdenstain Als verre, Daz Er dar vmb ainer Vrthail dingt fuer meinen Herren Hertzog Albrechten von Osterrich Vnd die selb vrtail in dem nachten (sic) lanttaiding dar nach hie vor ze Perig sein gebesen. Da die vrtail nicht chom, da stuend jch vf an. dem Mitichen Vnd satzt meinen vetern Reinprechten von Waltse an. mein stat Von meines Herren des Hertzogen begen vnd nam ainen vorsprechen, den hiez jch dar vmb vragen; seid daz die vrtail hie vor solt sein Vnd hie vor nicht enber, waz dar nah recht beer; Da ward mir ertailet, Ich wer geruebt vmb daz Hows ze Vrewdenstain Vnd vmb die ansprach, dar vmb si mich ansprachen Vnd da von daz jch Lantrichter was, Hab jch den Brief versigelt mit meines Veter jnsigel Reinprechts, den jch an mein stat gesetzt het, Vnd mit meinem Jnsigel. Ez ist ouch gezeug mit ier Jnsigel mein Swager Her Hainrich von Volchesdorf, Gvndakcher von Starchenberch, Hans von Reihenstain vnd Her Vetz von Tann. Der Brief ist geben ze Perig, da von Christes geburd waren ergangen Dreuczehen Hvndert vnd Virtzich Jar, Des nachsten Mithen (sic) nach Sand Merteins tag des Heiligen Pichscholfs.

Source Fulltext: OÖUB 6 (Wien 1972), S. 356, Nr. 351