Wir Bruder Leupolt zv den zeiten Apt ze Lyligenueld vnd Der Conuent gemain des selben Chlasters veriehn vnd tvn chunt allen den, die disen Brief sehent oder ho^erent lesn, Daz wir mit wol bedahtem mv^et vnd mit veraintem rat zv der zeit, do wir daz wol getvn mahten, reht vnd redleich verchauffet habn vnsers rehten aygens vier Haymwesn, die gelegn sind in dem Newenwald pei Hahenberch mit allem dem, daz da zue geho^ert, swie daz genant ist, als si hie benant sind: Seydel der zêchninch dient alle jar funf vnd sibentzig wienner phenning, ainen halben mêtzen magn, fvnfzehn chês, der igleicher ains phennings wert sei, vnd ain schoˆet har, Peter auf dem Pvˆhel aht vnd dreizzig phenning, siben ches oder fvˆr igleichen ainen phenninch, ain halbes schoˆt har, ain virtael magn, Leutolt im Revˆt zehn phenning, ainen halben mêtzen magn vnd ain schoˆt har, Chûnrat auf der êbn funf vnd dreyzzig phenning, ain viertael magn, drey chês, igleichen fûr funf phenning, ayn herbst hv^en, vnd ain Hofstat in dem marcht ze Hahenberch, da man zwen vnd zwainzig phenning von dienet. Daz varbeschriben gu°t vnd swaz da zue geho^ert ze veld vnd ze darfe, Holtz, waed, wismad, versueht vnd vnuersueht mit allen dingen, daz habe wir verchauffet den erbern herren hern Dietreichen vnd hern Stephann van Hahenberch vnd ir paider erben vmb Nevˆnzehn phunt phenning wienner mvˆnzz, der wir gar vnd gêntzleich sein gewêrt. Vnd schullen die selben herren vnd ir erben mit den vargenanten gu^eten vnd swaz da zue geho^ert, furbaz allev wandlung habn, swie in daz fûege vnd die auch habn mit allem rehten vnd nûtzze, als wir die enher gehabt habn in rehter aygens gwêr, allen ireu frumen da mit schaffen, als mit anderm irem aygen, mit versetzen, verchauffen vnd gebn, wem si wellen on allev irrung. Wir setzen vns auch vber die selben gu^et vnd swaz da zue geho^ert, den ebenanten herren und ihren erben zv rehtem scherm vnd gwern fu^er allev ansprach, als reht ist aygen zeschermen in O^esterreich, vnd swaz in chost oder mve mit ansprach von reht dor auf gieng, daz schulle wir in ablegn vnd schullen si daz habn auf vns vnd auf allem dem gu^et, daz wir habn in O^esterreich. Vnd dor vmb, daz allez, daz vargeschriben, fu^erbaz also stêt vnd ûnzebrochen beleibe, gebe wir den egenanten herren von Hahenberch disen Brief zv ainer bestetigung der sache versigelten mit vnserm vnd mit vnsers Conuents jnsigeln. Der Brief ist gebn nah Christbu^erd vber Tausent jar, Drevhundert jar, jn dem ayn vnd virtzigisten jar An sand Veyts Tag.

Source Fulltext: OÖUB 6 (Wien 1972), S. 379f., Nr. 376