Jch Bru^eder V^elman zden zeiten Minister der Minnerpruder in Osterreich vergich offenleichen an disem brif vnd tun chunt allen den, di in horent, sehent oder lesent, di nv lebent oder noch hernach chumftig werdent, daz ich mit wolbedachtem mu^et, mit willen, gunst vnd Rat der pesten Bruder in der vorgenanten Prouintz den Edeln, Erwirdigen herren hern Reinprechten vnd hern Fridereichen Brudern von walsse zden zeiten Hauptman ze Ens, von den di Pru^eder fuderung, gu^ettat vnd hilff emphangen habent vnd noch allzeit emphahent, durich der trew willen, di sev vnd ir vadern lang habent manichualtichleichen erzaigt vnserm orden vnd besunderleichen ze Ens, gehaizzen vnd gelubt han, daz man in alltag immer ewichleichen funf Mezz haben sol ze Ens in dem Chloster, di funf priester Minnerpruder ordens sprechen sullen ze hilff vnd ze trost irs liben vaters sel vnd irs Bruder sel vnd irr Muter Sel, den got genad, vnd irr paider sel ze hail vnd auch irr paider Hausurowen sêl vnd irr Chinder sêl vnd aller ir nachchomen sêl. di erst Mezz sol gesprochen werden in dem vorgenanten Chloster ze Ens in dem Cho^er vor dem Ampt, die ander mezz in demselben Cho^er nach dem Ampt, di Dritt mezz auf sand Thomas alter, di vird mezz in der Chappellen auf sand Johanns alter, di funft mezz auf sand Pangretzen alter auf der Parchirichen vntzt daz si ein Chappell stiften vnd pawen in dem egenanten Chloster, als si gedacht habent. wenn daz geschicht, so schullen di vorgenanten mezz gesprochen werden in derselben Chappelle vnd nindert anderswo an ir haizzen, gunst vnd willen. Vnd daz di gelub von mir vnd von allen meinen nachchomen ewichleichen stêt vnd vnzebrochen beleiben, Dar vber zv einem,vrchund gib ich den egenanten herren disen brif gesigelten mit meinem anhangunten Jnsigel vnd zv einer pezzern sicherhait mit des Conuents des vorgenanten Chlosters ze Ens anhangvnten Insigel. Daz ist geschehen nach Christes gepurd vber Drevzehenhundert Jar, dar nach in dem Drev vnd virtzkistem Jar an sand vlreichs tag.

Source Fulltext: OÖUB 6 (Wien 1972), S. 450f., Nr. 446