Ich Alber von liechteneck vergich vnd Tv^en chvnt allen den, di disen brief lesent oder horent lesen, di nv lebent vnd her noch chvnftig sind, Daz ich mich verebent han mit mein lieben Swegeren Hern Eberharten vnd Hern Heinreichen von Walsse zv den Zeiten Hauptleuten ze Drosendorf vmb di guet, di ich mein chinden ledichleich gib, di ich vnd ir Swester mit Ein ander gehabt haben, der got genad, den selben gib ich ledichleich mein Tayl ze Ro^espach an der vest mit allen den, vnd dar zue gehoret mit paw, mit holcz, mit pawmgarten, versu^echcz vnd vnuersu^echcz vnd mit zehen phvntten gelcz, di do ligent ze Ro^espach, ze marcharczrevt vnd zv Chrotendorf, daz guet allez sampt sol ich mein chinden Heinreichen vnd Chv^enraden lazzen, daz ich in daz an chainer stat verchvmer (sic) schol Vnd gib in auch Prvnssendorf di Vest mit allen nvnczen (sic) vnd Rechten, alz es mein Sach ist von mein Swegern Hern Eberharten vnd Hern Heinrichen von Walsse von Drozendorf. Ich lub auch allew di guet, die vor verschriben sint an disen brief, ob ich die yndert versaezt vnd verchvmmert het, di sol ich alle sampt gar vnd genczleich ledig machen mein vor genantten chinden inner iarz vrist; Tet ich dez nicht, wan mich dan mein egenantten Sweger mant, so schol ich inne legen zwen Erber chnecht mit vier phertten gen Chrems in Ein Erber gasthaus, wo mir mein egenanten Sweger hin zaigent, Vnd di schullen in do inne ligen vnd laisten, alz inne ligens recht ist vnd nymmer von dan chomen, Vnczzen ich egenantter Alber di vorschriben guet alle ledig vnd loz mache, wo si haften sind, Vnd die Vierzich phvnt gelcz, di meins brueder Wytib inne hat, dem got genad, vnczzen an iren Tod. der selben gevallent Zwaysich (sic) phvnt gelcz auf mich, wan si nicht en ist, vnd zwaysich phvnt gelcz auf meins brueder chint. Vnd wan daz geschicht, so schullen dann meinew zwaizich phynt gelcz meiner vorgenantten chinde sein an allen chrieg vnd an allen irresal vnd schol in auch di selben zwayzich phvnt gelcz nyndert verchvmern, daz lub ich mit mein trewn. Ich egenanter Alber von Liechtenek sol di vor verschrieben guet alle sampt inne haben vncz an mein Tod vnverchumert Also mit auz genomer Red, daz ich meinew chint do von Neren schol, Vnd wan meinew egenantew chint gewachsent, daz si Weyp nemen welt, so schol ich in der vorgenantten guet hin dan geben so vil, alz mich mein Sweger Her Eberhart vnd Her Hainreich von Walsse haissent oder jr nochst Erben haizzent, ob si nicht enweren, dez Got nicht engeb, Vnd schol dan das ander guet haben vncz an mein tod vnverchumert; vnd noch mein tod schol es ledichleich meiner egenantten chinder sein an alle chrieg vnd an allen irsal, daz lub ich in zelaisten stet ze haben mit mein trewn. Vnd gib in disen brief versigelten mit meim Insigel vnd mit der Erbern Herren Insigeln Hern Otten von Wald vnd Heren Chvnracz von liechtenek mein Vetern, di der sache gezeug sind vnd ander Erber leut genvech, den di sache wol chvnt ist. Diser brief ist geben, do man zalt von Christes gepurd Drewzehen Hvndert jar vnd dor nach in dem vier vnd Virzigisten Jar an sand Annen Tag.

Source Fulltext: OÖUB 6 (Wien 1972), S. 487f., Nr. 483