Ich Chol von Sa^eldenhofen vergich offenleich an disem prief allen den, di in sehent, lesent oder ho^erent lesen, Di nu lebent vnd hernach chunftig sind, Daz ich mit verdachtem mu^et nach meiner pesten Vreunt Rat tzu° der tzeit, vnd ich es wol getu°n mocht, meiner Hausfrown Vrown Elspeten hern Albers Tochter von Scho^ennberch vnd hern Gotschalichs Witiben von Neytperig, den got gnad, tzu^e rechter Morgengab nach des Landes recht tze O^esterreich verlu°bt vnd verhaizzen han tze geben fu^enftzehen Hundert phunt wienna^er mu°nss, da ich ir fu°r gesatzt han mein vest tze Sa^eldenhofen, di mein recht aygen ist mit alle di, vnd da tzu^e geho^ert, tze veld vnd tze Dorff, es sey gestift oder vngestift, versucht (vnd vnuersucht) wie so daz genant ist, in allen den rechten und nu^etzen, vnd ichs vnd mein vor vodern von alter her pracht haben, als Satzes vnd Morgengab recht ist Vnd des Landes recht tze Steyr. Vnd dar u°ber tzu° einer pezzern sicherhait So setz ich mich vorgenanter Chol von Sa^eldenhofen vnd tzu^e sampt mir vnuerschaidenleich mein O^echaim hern Eberhartn vnd hern Hainreichen di Pru^eder von Waltse zden zeiten Hawptlent tze Drossendorf meiner vorgenanten Hausfrown Vrown Elspetn u^eber die egenanten vest vnd Morgengab tzu rechten Scherm vnd gwern fu^er alleu ansprach, als aygens vnd Satzes vnd Morgengab recht ist Vnd des Landes recht tze Steyer. Ob si dar u^eber mit recht icht chriegs dar an gewunn, daz schu^ell wir ir aus richten an allen irn schaden, Daz schol si haben auf vns vnd auf v^ensern triwen vnd auf alle di, vnd wir haben in den Landen tze O^esterreich vnd tze Steyer. Wann auer daz ist, daz ich egenanter Chol von Sa^eldenhofen di obengenant vest losen mag vnd wil, So schol si sey mir oder meinen egenanten O^echaimen hern Eberharten vnd hern Hainreichen von Waltse zden tzeiten Hawptleuten tze Drossendorf wider tze losen geben umb di selben phenning, vnd vorgeschriben stet, ob wir die gehaben mu^egen, Vnd schol si dann di selben phenning nach v^enser payder Vreunt Rat in dem Lant tze Steyer an Erib auf di erden nider legen, do si v^enser payder Erben wizzen tze vinden. Mo^echt wir auer der phenning nicht gehaben, So schu^ell wir die oftgenanten vest losen mit Erib, wo wir daz haben in dem Lant tze Steyer nach v^enser paider Vreunt Rat, di wir dann da tzu^e chiesen also, daz ir ymmer geuallen schol fu^er tzehen phunt beraitschaft ain phunt geltz. Vnd ist, daz wir Erben gewinnen mit ein ander, Da schol daz vorgenant gu^et nach v^enser payder tod auf erben vnd geuallen. Wa^er auer, daz ich vorgenanter Chol von Sa^eldenhofen an erben verschied, das got nicht engeb, So schol mein egenanteu Howsfrow Vrow Elspet daz oftgenant gu^et vnuerchumbert inn haben vntz an irn tod Vnd nach ir tod schol es her wider geuallen vnd erben auf auf (sic) ander mein Vreunt, daz (sic) is tze recht hin geuallen schol. Daz als lob ich oftgenanter Chol von Sa^eldenhofen staet tze haben pey mein triuen an aydes stat Vnd gib dar u^eber disen prief tzu° einem warn gezeug vnd tzu° einem offen vrchu^end versigelt mit meinem anhangunden jnsigel Vnd mit meiner O^echaim jnsigel der vorgenanten hern Eberhartz Vnd hern Hainreichs von Waltse zden zeiten Houptmannen tze Drossendorf, die der Morgengab vnd des Satzes mit sampt mir Scherm vnd gwern sind nach des Landes recht tze Steyer, Vnd mit der Erbern herren jnsigel hern Reinprechtz von Schonnberch Vnd hern Jansen des Tu^ersen von Rauchenekk, di diser sach zeug sind mit irn anhangunden jnsigel. Der prief ist geben, do man zalt von Christes gepu°rt Dreutzehen Hundert jar, dar nach in dem vier vnd Viertzgisten jar an sand Katreyn Tag.

Source Fulltext: OÖUB 6 (Wien 1972), S. 497ff., Nr. 494