Ich Gotschalich von Flachenek vnd Ich Elzpett sein Hauzwrau vnd alle vnser erben wier vergehen vnd tu^en chunt allen den, di disen brief sehent, lesent oder hörent, Daz wier mit wol wedachtem mu^et vnd nach vnser pesten vrevnt rat vnd mit aller vnser erben gu^etleichen willen vnd wort cze chauffen haben geben Dem Hochwierdigen fuersten dem Erwelten Hern Leutolten dez Pistums cze freysing vnd sein bru^edern Graf wernharten, Graf Ru^edolfen, Graf fridreichen von Schavnwerch di gu^et, di her nach geschriben stent: vier gu^et datz Höfing vnd ein gu^et datz Speting vnd ein gu^et datz Eod vnd ein gut datz Speche vnd ein gu^et datz Hugendorf vnd ein halbz gu^et da selb vnd ein halbz gu^et datz Echental vnd zwen wisfleche auf der estenawe vmb Sybentzk phunt alter wienner phenning, der wier gar vnd gantz gewert sein also mit beschaidner red: swenn graf wernhart oder graf Ru°dolf oder graf fridreich ier ainer, swelher vns dar zv vodert, so schullen wier ins auf geben vor dem bischolf von de pazzawe. wer aber, daz er in nicht leichen wolt, dez schu^ellen wier vnengolten sein denn alz vil, ob er sev mit eim Recht an sprech, so schullen wier vnd vnser erben, di vnser gut nach vnserm tod wesitzent, recht gewer sein nach landes recht ob der ens. Wer aber, daz wier oder vnser erben di gwerschaft verzugen, swaz si des schaden nement, den si vns mit eim recht weweisen mugen, den schullen wier in ab tu^en vnd schullen si daz haben auf vns vnd auf aller vnser hab, swo wier di haben in dem lant ze osterreich oder ob der ens, versucht vnd vnuersucht. Daz di red stet vnd vnzewrochen weleib, Dar vber geben wier disen brief gesigelten Ich Gotschalich von flachenek vnd Ich Elzpett sein Hauzwrau mit vnser payder anhangunden insigeln vnd mit meiner bru^eder Chu^enratz vnd Otten von flachenek insigeln vnd mit meinz aydemz Insigel Go^ergen des Hoeusler, di der sache zeug sint. Der brief ist geben nach Christes gepurd Dreuzehen Hundert Jar vnd in dem fvmf vnd viertzkistem Jar des Eritags vor Gotleichnam tag.

Source Fulltext: OÖUB 6 (Wien 1972), S. 513f., Nr. 510