Ich Chu°nrat von Tyerenstayn vergich vnd tu^en chunt allen den, die disen brief lesent oder ho^erent lesen, die nu lebent vnd hernach Chu^enftig Sint, Daz ich mit aller meiner Erben gu^eten willen vnd gunst, mit verdachtem mu^et zu^e der zeit, do ich iz wol getu^en mochte, Recht vnd redleich ledichleich aufgegeben han Meinem Genaedigen Herren Dem Edeln Hochgeporn fu^ersten Hertzoge Albrechten in O^esterreich, in Steyr vnd in Chaernden meines rechten Lehens, daz ich von im ze lehen gehabt han, Dez ersten meines rechten Erib Vogtay Vierdhalb phunt vnd Sibentzig phenning wienner mu^enzze geltes, die da ligent auf den Gu^etern, die hernach geschriben stent, Dez ersten datz Marichartsdorf auf zwayn Ho^efen vnd auf einer Hofstat, datz Pru^ensleinsdorf auf einem Hof, Datz Soeserndorf auf einem Hof vnd auf alle deu, vnd darzu^e geho^eret ze Velde vnd ze dorffe, Es sei gestift oder vngestift, versu^echt oder vnuersu^echt, Swie so daz genant ist, Vnd einen wagen mit Zwain phaerden aller ding bericht mit allen Sachen, Swenne man ein heruart auz dem Lande vert, fu^er vierdhalb phunt wienner pbenning geltes auch auf den vorgenannten Gu^etern. Die vorgenanten Gu^elt alle, die Vogtey vnd den wagen, als vor verschriben ist, vnd auch alles daz recht, daz ich auf den egenanten Gu^etern gehabt han, Han ich recht vnd redleich ledichleich aufgegeben Dem vorgenanten meinem genaedigen Herren Hertzoge Albrechten vnd allen seinen nachchomen fu^erbaz ledichleich vnd vreyleich ze haben vnd allen irn frumen damit ze schaffen, als in daz allerpest wol cho^em vnd fu^ege an allen irresal. Vnd daz diseu sache fu^erbaz also staet vnd vnzerbrochen beleibe, Darvmb so gib ich Im disen brief zu^e einem offen vrchunde vnd zu^e einem warn gezeuge diser sach versigilt mit meinem Insigel. Diser brief ist geben ze wienne nach Christes Gepurd dreutzehen Hundert iar, darnach in dem fu^emf vnd Viertzgisten iar an vnsers Herren Gotes Leichnam Tage.

Source Fulltext: OÖUB 6 (Wien 1972), S. 517f., Nr. 513