Wier Albrecht von gotes gnaden Hertzog ze O^esterreich, ze Steyr vnd ze Kernden Tu^en chunt mit disem brief, Daz vns vnser getrewen lieben . : die Purger gemainlichen ze Ens vnser Gericht vnd mautt, Daz Vrbar vnd das Lantgericht daselbes ze Ens von vnsern getrewen Reimprechten vnd friderichen von Walse von Ens gelo^est haben vmb Tausent phunt Wienner phenning, darumb si derselben von Walse Phand von vns waren, Vnd darumb, daz vns dieselben vnser Purger di vo^ergenanten Tausent phunt phenning an diselb losung gelihen habent, So haben wier in vnser Gericht vnd mautt ze Ens verschriben vnd verschreiben in ouch die mit disem brief von sand Mertteins tag, der schierist chumt vberVier gantzev iar nach einander, daz si der vo^ergenanten Tausent phunt wienner phenning da von gentzlich bechomen, Vnd sullen si ouch ierlichen von alle dem, daz von der mautt vnd von dem Gericht geuellet, vnser Purger ze Ens richten des geltes, so si vns gelihen habent, also daz armen vnd reichen vnsern Purgern ze Ens geualle von dem gelt nach der Summ, so er vns gelihen hat, daz si ieres geltes gentzlich gericht werden. Wier verhaizzen ouch den vo^ergenanten vnsern Purgern von Ens disev sache stet zehalten bei vnsern gnaden fu^er vns, vnsern lieben su^en Hertzog Rudolfen vnd fu^er vnser nachkomen. Ouch wellen wier, daz Vlrich der fumfchiricher daz erst iar von vnsern wegen an der mautt sei vnd daz vnser Purger von Ens ouch zwen erber Purger dartzu^e schaffen, daz den leutten gemainlichen mit der werung dester rechter mit geuaren werde, Vnd daz auch die Purger dieselben Vier jar einen Richter nemen, der in aller fuegleichist sel. Des geben wier ze v^erchund disen brief besigelten mit vnserm jnsigel. Geben ze Lyntz an Sunntag nach sand Michels tag Nach Christes gebu^erd Dreutzehen Hundert Jar, darnach in dem fumf vnd Viertzkisten jar.

Source Fulltext: OÖUB 6 (Wien 1972), S. 528f., Nr. 523