Ich Reinprecht von Pilichdorf Vergich tu^en chunt allen den, die disen brief lesent oder hörnt lesen, Daz mich mein swager v^elreich von Pergawe Recht vnd redleichen verricht vnd gewert hat zv meiner hausurowen vron Hoedweigen seiner swester fu^emf Hundert phunt wienner phenninge, also daz ich im die wider legen sol mit Erbe nach vnser baider freunde Rat von dem hevtigen tag inner Jars frist. Tu^en ich dez nicht, swenne er mich denne dar nach mant vnd vordert, so sol ich im zwen Erber Ritter maezzig Chnehte iedenman selb ander mit zwain Phaerten dez naechsten tages dar nach hintz wienne in ein Erber Gasthaus senden, swa mir mein swager v^elreich von pergawe oder sein erben hin zaigent, vnd suln die da inne ligen vnd laisten, alz laistens recht ist, vnd sol da nimmer auz chomen, In werde ee alles daz gaentzleichen gelaist vnd volfu^ert, daz vor an disem brief geschriben stet. Waer aber, daz ich inder zeit nicht enwaer, dez Got nicht enwelle, so suln si die vorgenanten fumf Hundert phunt haben auf allem meinem gut, daz ich hinder mir lazz in dem Lande ze O^esterreich, vnd suln auch si der da von gaentzleich gewert werden vnd suln in auch da von widerlegt werden an allen chrieg vnd an alle wider rede. Vnd gib in dar vber disen brief zv einem warn vrchund versigilt mit meinem Insigel vnd mit meins vetern Insigel hern Albers von Rauhenstain vnd mit hern Reinprechtes Insigel des Tu^ersen, die diser sach gezeug sind mit irn Insigeln. Diser brief ist geben ze wienne nach Christes gebu^erd Dreuzehen Hundert iar, dar nach in dem sechs vnd Viertzgisten iar an Sand Gedrauten tag.

Source Fulltext: OÖUB 6 (Wien 1972), S. 543f., Nr. 537