Ich Eberhart von Walsse houptman ob der Ens vnd ich vlreich von Walsse houptman in Steyer vnd ich Weichart von Winchel vnd ich Rudolf Ott von lichtenstein Chamrer in Steyer Wir vergehen offenlich mit disem brief vnd tun chunt allen den, di in sehent, ho^erent oder lesent, di nv sind oder her nach chu^enftich sind, Daz di erbern herren her Chunrat Pischolf ze chiemse vnd her Ru°dolf vnd her Ott vnd Andre vnd fridrich vnd Janns vnd Rudolf bru^eder von lichtenstein an einem taile Vnd der erber herr her Fridreich von Walsse vnd vrow Chu^enigunt sein housvrow fu^er sich vnd all ir paider erben Sv^en vnd To^echter an dem andern tail Mit gu°tem willen vnd mit zeitigem rat irr pesten vrewnt hinder vns vier sind gangen vnd vns ouch vollen gewalt habent geben gentzlich ze berichten vnd sprechen vmb all dev ansprach vnd vordrung, di der vorgenant fridreich von Walsse vnd vrow chu^enigunt sein housvrow vnd all ir paider erben habent gehabt oder gehaben mochten hintz den egenanten bru^edern von lichtenstein vnd hintz irn erben vmb allen den Erbtail, der in vnd irn erben mo^echt geuallen von allen dem Erbe, daz her Rudolf der alt von lichtenstein, dem got genad, lazzen hat seinen vorgenanten Sv^enen, daz sei an vesten, an steten, an vrbar, an weinga^erten, an perchrechten, an Ho^eusern, an Purch rechten vnd an anerstorbem Erbe vnd an leuten oder an gu^et, besucht vnd vnbesucht, wie di genant sein. So sprechen wir vorgenant vier Schidleut v^eber dev obgenanten ansprach also mit veraintem mut vnd mit gesampten Rat, daz di vorgenanten Siben bru^eder von lichtenstein su^ellen geben der egenanten vrown Chu^enigunden vnd hern fridrichen von Walsse vnd iren erben, di si mit einander habent Newn hundert pfunt wienner plienning zu den dreyn hundert pfunten, di si nv vor habent enpfangen von irm vater hern Rudolfen dem Alten von lichtenstein, fu^er alle dev ansprach vnd fordrung, di si habent oder gehaben mo^echten hintz den obgenanten Siben bru^edern von lichtenstein vnd hintz irem Erbe vnd sullen ouch fu^erpaz noch mu^egen dhein ansprach oder fordrung nicht mer haben hintz den vorgenanten bru^edern von lichtenstein vnd hintz irem Erbe, Es wer dann, des got nicht welle, daz di egenanten siben bruder von lichtenstein all on erben verfu^eren, so schol dann di vorgenanten vrown Chu^enigunden von Walsse vnd ir erben angeuallen alles, daz sei ze recht an erbet vnd angeuallen mag. Wir sprechen ouch, daz die vorgenanten bru^eder von lichtenstein sulln wern vnd richten hern fridrichen von Walsse vnd vrown Chu^enigunden vnd ir erben der vorgenanten Newn hundert pfunt pfenning ouf di hernach geschriben taege: Ouf sand Merteins tag, der schirist chu^emt, sollen si wern dreyer hundert pfunt pfenning vnd dar nach ovf dev na^ehsten vasnacht dreyr hundert pfunt pfenning vnd dar nach ouf den na^ehsten sand Gorgen tag dreyr hundert pfunt pfenning. Wir sprechen ouch, daz der egenant her Fridreich von Walsse vnd vrow Chu^enigund sein housvrow vnd ir erben sullen di Newnhundert pfunt pfenning, di in da gebent di bru^eder von lichtenstein vnd di drew hundert pfunt pfenning, di si vor habent enpfangen, an legen an Erbe vnd ouz zaigen an geua^er also, ob daz geschech, des got nicht welle, daz si vnd ir erben verfu^eren, so schu^ellen dann di zwelf hundert pfunt pfenning oder daz erbe, daz dar vmb gechouft ist, wider angeuallen di bru^eder von lichtenstein vnd ir na^ehste erben, als lands recht ist. Vnd daz diser spruch also stet vnd vnzebrochen beleib an alls geua^er, geben wir vorgenant vier Schidleut disen brief ze einem woren vrchu^end versigelten mit vnsern anhangenden Insigeln. So vergehen wir egenanter Chu^enrat pischolf ze Chiemse vnd ich Rudolf vnd ich Ott vnd ich Andre bru^eder von lichtenstein mit vnsern Insigeln, di wir an disen brief haben gehangen, daz diser spruch ist geschehen mit vnserm gu°ten willen vnd verhaizzen ouch pei vnsern trewen, daz wir den spruch stet behalten an alls geua^er. So verpind ich mich egenanter fridreich vnd ich Janns vnd ich Rudolf bru^eder von lichtenstein vnder vnsers lieben bruder Andres von lichtenstein insigel, wand wir selb noch chain Insigel nicht haben, dass diser spruch geschehen ist mit vnserer gunst vnd verhaizzen ouch in pei vnsern trewen stet behalten an alls geua^er. Diser spruch ist geschehen vnd der brief geben am Mitichen vor vnser Vrown tag in der Vasten nach Christi geburd Dreutzehen hundert Jar vnd dar nach in dem sechsten vnd Viertzigsten Jar.

Source Fulltext: OÖUB 6 (Wien 1972), S. 545f., Nr. 538