Nos frater Vlricus dictus Abbas in Campo Lyliorum et Conuentus ibidem Profitemur, nos vidisse antecessoris nostri domini Leupoldi Saluas literas per omnia in hec verba. Nos frater Leupoldus dictus Abbas et Conuentus Monasterij Campi Lyliorum Scire volumus inspectores presencium vniuersos, Quod venerabilis sacerdos dominus Hainricus prouisor Capelle Sancti johannis baptiste in traisma ob sue anime nec non et progenitorum suorum salubre remedium sacrificium laudis secundum facultatum suarum possibilitatem summo deo offere desiderans de donis sibi a domino collatis nostro Monasterio domini Otakari nostri antecessoris temporibus quinque talenta denariorum wienensium liberaliter erogauit Ita sane, ut annis singulis nostro Custodi septem metretas puri tritici de nostro granario pro conficiendis hostijs perpetuo ministrentur, Qui etiam Custos omnibus sacerdotibus ab ipso petentibus dabit hostias occasione qualibet postergata (sic). Sed vt suam circa corporis christi sacramentum venerabilem idem Hainricus deuocionem eximiam ostenderet euidenter, Redditus sexaginta denariorum iuxta Wilhamspurgam, qui seruiuntur annuatim Michahelis de agris et alijs ibidem retro domum quondam Eyte sitis cum omnis proprietatis iure et quatuor talenta denariorum wiennensium nobis ac nostro Monasterio similiter condonauit Condicione eiusmodi interiecta, vt prefatus Custos dictos redditus manu teneat ac colligat suoque subcustodi dictos sexaginta denarios omni anno porrigat, Quatinus per hoc labor eiusdem subcustodis in precisura hostiarum ceterisque deuotis ministerijs consulcius valeat sustentarj. Nosque pro dictis quatuor talentis vnam vrnam vini Conuentus singulis annis hijs, qui pistant hostias simul vel diuisim, sicut recipere placuerit, promittimvs fore dandam. E nos insuper volumus eisdem pistantibus pro corporis solacio dari vnam vrnam eiusdem vini, ut deuocionis et elemosine mereamur participes inueniri. Debet et antedictus subcustos precisas confratrum nostrorum hostias prefate ecclesie in Traisma, quociens postulantur, perpetuo ministrare Et vt omnia et singula prescripta ratihabitacione (sic) stabili confirmentur, presentem literam nostris videlicet Abbatis et Conuentus Sigillis sepedicto Hainrico suisque sequacibus ob perpetuam predictorum euidenciam dedimus roboratam. Actum et Datum Anno domini Millesimo Trecentesimo Tricesimo Octauo jn festo beatissime virginis Margarete. Nos vero, ne in posterum tam in dicti domini Hainrici remedio, quam et nostri Custodis deuoto seruicio materia contencionis alicuius valeat suboriri, jd circo ecclesie (sic) quibus porrigende sunt hostie, volumus nominari, videlicet ad ad (sic) sanctum vitum, Wilhamspurgam, Durniz, Chreuzpach, Hohenwerch, Traisma, Eschenaw, jta sane, vt dictarum ecclesiarum rectores, qui ab olim consweuerunt, nostrum Monasterium deuocionis causa cum cera annaliter (sic) visitare propter hoc a ceptis non desistant, sed studeant decetero eadem annis singulis augmentare. Custos vero noster, si in dictis negligens fuerit vel remissus, Tam diu vino careat, quovsque ornnis negligencia totaliter reformetur. Et; in omnium predictorum euidenciam nostra sigilla presentibus sunt appensa. Datum esto michi Anno domini millesimo trecentesimo quadragesimo sexto.

Source Fulltext: OÖUB 6 (Wien 1972), S. 541ff., Nr. 535