Wier Albrecht von Gots gnaden Herczog ze O^esterreich, ze Steyr vnd ze Chernden Tu^en chunt offenlich mit disem prief, Daz fu^er vns chom die erber Agnes vnsers getriwen Thomas des Esels von Gadem hausvrow, Hainreichs seligen Tochter dez Hu^etter von Paden vnd verczeh sich vo^er vnser mit iers vo^ergenanten wiertes gu^etem willen vnd gunst aller ansprach vnd wartung, die sei hiet oder haben mo^echt an der Veste Sechsenekk vnd waz darczu^e geho^ert vnd aller der gu^eter, so sei von ier mu^eter Margreten seligen der Hu^etterin angeuallen solten oder der sei von ier wartend wer, wie die genant sein oder wa sev gelegen sein, vnd gab ier recht vnd ier wartung dar an genczlich vnd ledichlich auf vo^er vnser vnsern getrewen Burcharden dem Chneuzzer vnd Niclen dem Chneuzzer seinem Vetter in aller der weise, als die prief sagent, die sei in dar vber geben hat. Dez geben wier ze vrchunde disen prief besigelten mit vnserm jnsigel. Geben ze Wienn an Mittich vor sand Symons vnd sand judas tag Anno domini millesimo ccc°. xl°. sexto.

Source Fulltext: OÖUB 6 (Wien 1972), S. 564f., Nr. 558