Wir Gedraut von Gotes gnaden Aptessine ze Traunchirchen veriechen vnd tu^en chunt, Daz wir Elspeten, dev Vlreichs hausvrowe von Wasen gewesen ist des amptmans, vnd auch allen iren erben geliehen haben ze rechtem erbrecht am hof auf dem Wechlinge, als si den vnd ir erben geworfen beten, mit allen nutzen, di dartzve gehornt, emolen van den tzwain abtessine vrowen Osann vnd von vrowen Chunigvnten, die vnser voruordern sinde gewesen, also mit solicher weschaidenhait haben wir ir vnd iren erben geliehen ze erbrecht den hof, daz si vnd ir erben alle jar vns vnd vnserrn gotes haus da von dienen suln an sand Gorigen tag dreizzich phennich wienner mvnzze hintz Traunchirhen. Ist daz getan, daz si oder ir erben di dreizzig phennig an dem vorgenanten tag nicht gebent, so gent immer vber viertzehen tag sechtzig dar ze wandel. tet si oder ir erben daz sechs wochen gesten, so sol sei vnser pot auf dem vorgenanten hof phenten fu^er ain phunt phenning, vnd swer den vorgenanten hof anspricht, mit sweliher ansprach daz ist, daz sol di vorgenant Elspet vnd ir erben vnserm gotes haus auz pringen vnd ledigen ledichleihen vns an schaden vnd auch wer irr erben daz lant verburcht, der sol sein erbrecht verlorn haben an dem vorgenanten hof. Dev hiegeschriben wandelvng ist geschehen vnd gewandelt vor vnser datz Traunchirhen mit aller erben willen vnd wart vnd mit aller ste^{^}t. Daz ir Elspeten vnd ir erben dev rede dirr sache also stêt vnd vnuerchert furbaz weleib, des geben wir in disen gegenburtigen prief ze einem waren vrchunde vnd westetigen den mit vnserm anhangundem ynsigel. Ez sind auch dirr sach getzeuge her Perichtram der Pehem, her Vlreich der Aichperiger, Chunrat der Celler, Ott van Talgav tzeden tzeiten schaffer datz Traunchirhen, Vlrich von Valspach vnd auch ander erberr leitt genuge. Der prief ist gegeben datz Traunchirhen, da von Christes geburde vergangen waren tausent jar, drevhundert jar, dar nach in dem siben vnd virtzigistem jar an sand Gedrauten tag in der vasten.

Source Fulltext: OÖUB 7 (Wien 1876), S. 8f., Nr. 9