Ich Jans von Reychenstain vergich offenbar an dem prief vnd tuen auch chvnt, das ich ze chauffen hab geben mein hueb, genant Zeyrcz, dy gelegen ist in Nevnchircher pharr, vnd lehen ist von dem edeln Herczogen in Osterreich, mit alle dem recht, vnd ich sey gehabt hab, Wulfinn zden zeyten stat richter in der Yreinstat vnd seiner hausfrown Elspeten vnd ir payder erben vmb sechs vnd dreyzzk phunt phenning alter Wienner mvns, der si mich gancz vnd gar gerieht vnd gewert haben, vnd schol auch ich egenanter Jans oder mein erben dem egenanten Wulfing oder sein erben dy vorbeschriben hueb aufgeben vnd mit herren hant richtig machen an allen chrieg vnd an all wider red, vnd auch an allen iren schaden, wenn si daz an mich oder an mein erben ayschent. Daruber zv vrchund vnd zv einem waren sichtigen zevg gib ich offt genanter Jans von Reychenstain in dysen offen prief fur mich vnd fur all mein erben wolbesigelten vnd bestaett mit meinem anhangundem insigel, vnd zv einer pezzern sicherhait mit meinez lieben pruder insigel Vlreichs von Reyhenstain fur allen chvnftigen chrieg. Der prief ist geben nach Christes geburd dreuzehen hvndert iar, dar nach in dem siben vnd vierczkystem iar dez mitichens in der chotember vor sand Michels tag.

Source Fulltext: OÖUB 7 (Wien 1876), S. 31, Nr. 33