Ich Weichart von Winchel vnd ich Katrey sein hausvraw vnd alle vnser erben vergehen vnd tuen chunt, daz wir gesatzzt vnd geben haben recht vnd redlich ze rechter haymstewer vnserm lieben aydem Otten von Lyechtenstayn vnd vrawn Anne seiner hausvrawn vnser lieben tochter den satz, den vns vnser lieber ohem her Albrecht der Purgraf von Gors gesatzzet vnd geben het fur drev hundert phunt wienner phenning. Den selben satz hab wir in geben vnd gesatzzt vnd allen ir payder erben mit allen dem rechten vnd nuczen, als er vns geben vnd gesatzzet ist vnd als wir in gehabt haben als sein prief sayt, den er vns darvmb geben hat. Den selben prief mit sampt dem vorgeschrieben gu^et hab wir geben vnd gesatzzet vnserm vorgenanten lieben aydem Otten von Lyechtenstain vnd vnser lieben tochter vrawn Anne seiner hausvrawen vnd ir payder erben mit allem dem rechten, als wir den prief vnd das guet inne gehabt habent. Vnd darumb durich pezzer sicherhayt vnd vrchunt geb wir in den prief ze ainem waren gezewg diser sach versigelten mit meinem anhangunden insigel, Vnd sind auch des gezewg di erbern herren, die hernach geschriben stent, mein lieber ohem her Alber von Rauchenstain vnd mein lieber ohem her Reinprecht von Schonberch, dew diser sach gezewg sind mit ir payder anhangunden insigelen. Der prief ist geben nach Christes gepuerd dreuczehen hundert jar, darnach in dem syben vnd viertzgisten iar an sand Stephans tag, als er erfunden ward.

Source Fulltext: OÖUB 7 (Wien 1876), S. 28f., Nr. 31