Ich Chvnrat von Tannberch vnd ich Cholhoch van Valchenstain vettern veriechen, vnd tun chunt, daz wir mit dem edlen hern hern Petern van Rosenwerch saetz haben mit dem gemerich dez landes tze Behem, daz an vnser Lant gemerich stoetzzet also beschaydenleich vnd an allez geuaer, wenne daz geschaech, daz wir van dez Chaysers wegen muesten tuen wider daz gemerich, so schullen wir ym vor ocht tag wider sagen vnd scholl der vryd vnd der satz dy selben ocht (Tage) zwischen vns staet vnd gantz beleiben angeuaer, als vor vnd waz ich inne hau van meinem hern dem Pyschoue tze Pazzawe, dy pfleg tze Velden vnd waz dar tzu gehort, daz schol in den selben saetzen sein. Waer aber daz getan, daz dhain schod van den vnsern hin in den saetzen geschaech, da hat her Hainreich van Welisching vnd her Tobische van Chaemnytz gewalt vns vmb tze sprechen, Vnd daz schulle wir in auztragen vnd auz rychten yner vier wochen. Daz gehayzze wir in mit vnsern trewen an aydes stat vollfueren. Waer aber daz getan, daz ein poezze volche chaem vnd wolt tuen auf sein recht an den gemerchen, da schulle wir tzu tuen mit vnsern dyenaern vnd mit vnsern vesten, daz ir wol secht, daz iz vngeuaerlieh geschechen sey vnd auch vns nicht lub waer. Vnd wenne dy stoezze aufgestozzen werdent van vnsern wegen, oder van dez wegen van Rosenwerch, so schulle wir vnser prief aneinander wider geben. Daz gehayzze wir mit vnsern trewen an aydez stat also volfueren, alz iz an dysem gegenburtygem prief geschriben stet. Daz dy red staet vnd vnverchert beleib, dar vber gib ich Chvnrat van Tannberch vnd ich Cholhoch von Valchenstain dysen offen prief mit vnsern anhangunden insigeln. Des ist geben, do man tzalt van chrystez gepuerd dreutzechen hvndert iar, dar nach in dem syben vnd viertzigistem iar dez phintz tages vor sand Mariam Magdalen tag.

Source Fulltext: OÖUB 7 (Wien 1876), S. 27f., Nr. 30