Wir Ludwig von gotes genaden Ro^emischer Keyser, ze allen Zeiten merer dez Reichs, bechennen offentlich vnd tun kunt, daz wir mit dem vesten mann Cunrat Tannenberger vnserm lieben getrewen vmb dienst also gerett vnd geteidingt haben, daz er vns mit zwelf mannen mit helmen hie zwischen vnd sant Marteins tag, der schirst chomt, vnd dar nach daz nehst gantz iar wider den Markgrauen von Merhern, der sich dez Reichs wider vns an genomen hat, vnd wider alle sein helfer vnd diener dienen vnd warten sol vberal im dem land ze Beyrn vnd an den gemerchen, wo hin oder wann wir in vordem, Vnd sol mit den selben helmen ziehen vnd varn vns vnd vnserm land on schaden vberal vnd swann er an die stat chomt, do hin wir in vordern, so sullen wir im dann kost geben als andern vnsern dienern Vnd vmb den selben dienst sullen wir im geben vnd richten zwai hundert pfunt Regenspurger pfenning vf sant Jorgen tag, der schirst chomt, Vnd ob der vorgenant Cunrat Tannenberger in der frist nit enwer, so sullen wir seiner Hausfrauwen vnd erben dez selben geltes vnd si vns dez vorgenanten dienstes gebunden sein. Dar vber ze vrchunt geben wir im disen brief versigelt mit vnserm insigel, der geben ist ze Lantzhut an mentag nach sant Johans tag ze Sunwenden nach Kristes geburt dreuzehen hundert iar, darnach in dem siben vnd vierzigstem, in dem dri vnd drizigstem iar vnsers reichs vnd in dem zweinzigstem dez keysertumes.

Source Fulltext: OÖUB 7 (Wien 1876), S. 25f., Nr. 27