Wir prueder Leupott apt vnd di sampnange gemain dacz dem Heiligen Chreucz veriehen vnd tven chvnt mit disem prief allen den, die in lesent oder horent lesen, daz vns der erber herr her Otto der Tu^erse von Rauheneke, dem got genad, hat gegeben einen weingarten, der gelegen ist ze Paden vnd haizzet der Chrump, zv einem ewigen jartag. Den selben weingarten hab wir mit dez erbern hern hern Jansen dez Tu^ersen dez vorgenanten hern Otten svn dez Tursen gunst vnd willen verchauft vnd geben haben vmb fvmftzich pfvnt wienner pfenning, der wir verricht vnd gewert sein. Dar fuer hab wir im vnd seinen erben fvmf pfvnt wienner pfenning geltes auz gezaiget auf vnserm hof ze Paden vnd auf allem dem, daz dar zve geho^ert, swie so daz genant ist mit so auzgenomner red, daz wir ewichleichen alle iar an sand Andres tag den egenanten jartag begen schullen mit vigili vnd mit sel messen vnd mit anderm rainem vnd gueten gepet nach vnsers Ordens gewonhait. Wir schullen auch an dem egenanten tag ewichleichen geben der sampnunge ainen ganczen dienst drew stuche gueter wische der pesten, di man ze der selben zeit winden mach vnd ain semel vnd dez pesten weins, der in dem vron cheler leit, ein pfruent an alle wider red vnd an allen chrieg. Waer aber, daz der vorgenant Iar tag, alz vor verschriben ist, wurd versavmpt von vns an ehaftnotdurft, so schol er sich oder sein naechsten erben zv der egenanten gvlt ziehen vnd di so lang inne haben, vncze daz di savmchait von vns werd gepessert vnd ervollet. Vnd daz dise vrchunde stat beleib, dar vber geb wir im disen prief versigelt mit vnsern paiden anhangvnden insigeln. Diser prief ist gegeben nach Christes gepvrd dreutzehen hvndert iar, dar nach in dem sv^eben und viertzigisten jar dez naechsten svntages nach sand Peternelle tag.

Source Fulltext: OÖUB 7 (Wien 1876), S. 23, Nr. 24