Wir Albrecht von gots gnaden Hertzog ze Osterreich, ze Steyr und ze Kernden, Herr ze Crain, auf der March und ze Portenaw, Graf ze Habspurg und ze Kyburch, Landtgraf ze Elsazze und Herr ze Phirtt etc. tun chunt offentlich mit disem brief, daz fur vns chomen unser purger gemainlichen ze Steyer und tetten uns ze wizzen, sy hetten ze etlichen zeiten ainen jarmarcht gehabt, der wer in vor etlicher sache wegen abgenommen und baten uns, daz wir in von gnaden wider erlaubten, ainen jarmarcht ze haben, daz haben wir getan durch ir bet willen und haben in erlaubt und erlauben auch mit disem brief, ainen jarmarcht alle jar ze haben, datz Steyer des nechsten sunntags vor dem Aufferttag und vreyung dartzu acht tag lang vor und acht tag hinnach ze wandeln und ze werken mit allerlay choufmanschaft. Si sullen auch auf demselben jarmarcht die vreyung haben, die ander unser stet in Osterreich auf iren jarmarchten habent an alle irrung; des geben wir ze urchund diesen brief besigelten mit unserm insigel. Geben ze Steyr an sunntag vor Sand Veitstag nach Christi geburd dreyzehenhundert jar, darnach in dem sibenundvierzikisten jare.

Source Fulltext: OÖUB 7 (Wien 1876), S. 25, Nr. 26