Ich Dictreich von Hag vnd jch Margret sein hauzwrau vnd vnser paider erben wier vergehen, daz wier ze chauffen haben geben vnserm liebem bru^eder Wolfharten von Hag vnd seiner hauzwraun wraun Ymmen vnd ieren erben vnsern Tueren ze Harthaime mit sampt der Hofmarich, alz iz mit zawn vnd mit groben vmfaren ist, vmb sechtzk phunt alter wienner phennig, der wier gentzleich vnd gor von in gericht vnd gewert sein also mit weschaidner red, daz wier in gelobt haben mit vnsern trewn, daz wier in allev di stet dar vber tu^en schullen, der si dar vber tuerfen vnd der si noturftig sein, swann si sein an vnz gerent,. so schullen wier inz auf geben vor dem herren, da iz lehen von ist. Daz in di red also stet vnd vnverchert weleib, gib ich in den brief versigelt mit meim anhangunden insigel, vnd zv einer zeugnuzze mit vnser lieben lieben (sic) wreunt insigel hern Alberz von Portzhaim, Hainreich von Aysterzhaim, Phyliphz von Alharting, Fridreichz dez Salz, in an schoden. Der brief ist geben nach Christez gepurd dreuzehen hundert iar, darnach in dem ocht vnd viertzkistem iar an sant Mathyas tag.

Source Fulltext: OÖUB 7 (Wien 1876), S. 46f., Nr. 51