Ich Leotolt der Chol und ich Margret sein housvrow^e veriehen mit disem prief, daz wir und unser paider erben von unserm tail, den wir zu erbrecht haben auf der hueb ze Haytzing von dem erwirdigen herrn Christan abpt ze Chremsmu^enster und von dem selben seinem gotshous alle iar iaerchleich an unser vrou^en tag ze der dienstzeit dienen schu^ellen unvertzogenleich dem selben hern und seinem eegenanten gotzhous vier und achtzk pfenning wienner mu^enzze und dar zu steu^er geben nach gnaden. Waer aber daz wir oder unser erben denselben dienst an dem vorgeschriben tag oder dew steu^er an dem tag und man sey ze recht geben schol, nicht gaeben ganz und gar, so schu^ell wir dem selben gotzhous und seinem phleger u^eber den vorgeschriben dienst und steu^er zu den naechsten drin virtzehen taegen nach den vorgenanten taegen von igleychen virtzehen taegen und in dienst und steu^er verzogen wurde, sechtzk pfenning wienner mu^enze zewandel schuldig sein und auch geben an all wider red. waer auch, daz in in den vorgeschriben drin virtzehen taegen dienst oder steu^er oder dew wandel verzogen wurde und nicht ganz und gar verrichtt wurden, so schu^ell wir in als unsers tails, den wir haben auf der vorgenanten hueb ganz und gar an all monung vervallen sein also, daz sich des selben unsers tails und unsers rechtes auf der selben hueb daz oft genant gotzhous und sein pfleger mit unserm und unser erben gueten willen an all ansprach underziehen schu^ellen und allen irn frum damit schaffen. Vnd daz das alles staet beleib und unverchert gib ich vorgenanter Leotolt fur mich und mein housvrow^en und all unser erben in disen prief versigelten mit meinem und meins pruder Ortolfes zwain anhangunden insigeln der mit seinem insigel im an schaden aller diser sache rechter zeug ist. Geben ze Chremsmu^enster, do von Christes gepurt gezalt warn drewtzehen hundert jar dar nach in dem acht und vierzkisten iar des nachsten mantages nach unser vrou^en tag zu der schidung.

Source Fulltext: OÖUB 7 (Wien 1876), S. 62f., Nr. 68