Ich Ott der Wiersinch vergich vnd tu^en chvnt, daz ich den erbern herren hern Hainreichen vnd Leotolden pruedern von Potendarf vnd allen irn erben meins rechten aygens den tayl an der mul ze Weinpresdorf, den mein vater, dem got genad, daran gehabt hat vnd der nu meiner mueter leibgeding ist, vnd nach irm tod auf mich vnd auf mein erben erben vnd geuallen scholt, als sei mein vater in aygens nutz vnd gewer her pracht hat, recht vnd redlich ze chauffen geben hau vmb sechs phunt wienner phenning, der ich gantz vnd gar gewert bin, also beschaidenlich, swenn meine mueter nicht enist, daz dann nach irm tod dieselb mul auf die vargenanten herren hern Hainrichen vnd hern Leotolden von Pottendarf vnd auf ir erben erben vnd geuallen schol ze gleicher weis, als var an disem prief geschriben stet, vnd lob auch mitsampt meinen erben, diselb mul ze vreyn vnd ze scherm vur all ansprach, als aygens recht ist vnd des landes recht ze Osterich, vnd gib in des ze vrchund vnd ze einer bestetigung diser sach disen offen prief versigelt mit meim jnsigel vnd mit meiner lieben vrevnt jnsigel hern Albers des Cherbechen vnd Dietrichs des Gyleis vnd hern Dietreichs von Gundramsdorf, di diser sach getzeug sind mit irn jnsigeln. Der prief ist geben ze Potendorf nach christes gepurd dreutzechen hundert jar dar nach in dem acht vnd viertzigstem jar an sand Florians tag.

Source Fulltext: OÖUB 7 (Wien 1876), S. 56f., Nr. 60