Ich Walchuen der Weizz vnd ich Fridreich der Weizz, wir payd prueder, wir veriehen vnd tun chunt allen den, di disen prief sehent oder ho^erent lesen, di nu lebent oder her nach chunftich werdent, daz wir vnsern acher, der gelegen ist in dem Stainpozz, habent geben mit wol bedahtem muet vnd mit guetleihem willen aller vnser erben zue der zeit, do wir ez wol getun machten, zue der ewigen mezz, div gestift ist zder pharr for vnser fraun alter in der abseiten stathalp, also beschaidenleich, daz wir von dem vor genanten acher raihen vnd gebn schuln ain phunt phenning geltz alle jar an sant Michelstag, vnd wir den acher auch inne haben schuln die weil wir payd prueder leben, vnd wann wir niht ensein, so schol der vor genant acher beleiben zue ainem ewigen selrat pey dem vor genanten alter. Daz diseu red also stat vnd vnuerchert beleib, dar vber geb wir egenanten tzwen prueder disen prief zue ainem sichtigen warn getzeug versigelt vnd bestat mit vnsern anhangunden insigeln. Vnd zue ainer pezzerr sicherhait mit dez erbern manns insigel Perchtolt Scheffoltz, der diser mezz anhefer ist gewesen vnd mit dez erbern manns insigel Vlreichs dez Funfchircher zue den zeiten statrichter ze Ens. Der prief ist gegeben do von Christes gepurt sint ergangen dreuzehen hundert jar dar nach in dem funftzgisten jar dez nahsten sunntags nach den ostern.

Source Fulltext: OÖUB 7 (Wien 1876), S. 179, Nr. 177