ICH Chalhoch vnd ich Vlreich rnd ich Haug brueder von Valchenstain wir veriehen vnd tuen chunt offenbar mit dem brief, daz wir mit wolbedachtem muet vnd nach rat aller vnserr pesten vreunt gegangen sein vmb alle vnser auflaeuff vnd chrieg, di wir mit einander gehabt haben, ez sey vmb vest, vmb erib, vmb manschaft, vmb dienaer oder vmb brief oder vmb welcherlay sach daz sey, gantz vnd gar hinder den hochwierdigen fuersten vnserm genaedigen herren bischof Gotfriden ze Pazzawe vnd herrn Chunraten von Tannberch, herrn Fridreichen von Praitenek, herrn Hansen von Reihenstain, herrn Lienharten von Moerspach, herrn Hansen von Trawn vnd hinder herrn Ludweigen auf dem Stain, also, waz dj all mit rat dar auz vindent, wo si daz tun oder wenn in dez di muezz werd, vnd waz sie sprechent vmb all vnser chrieg, ez sey vmb vest, vmb erib, ymb glueb, ymb brief, vmb manschaft, vmb diener oder vmb welherlay sach daz sey, daz schuellen wir allez staet haben an all widerred vnd verpinden vns auch mit vnsern trewn an aydes statt, darinn gehorsam (zu) sein an geuaer vnd an all irrung. Wier veriehen auch, ob in der weil der syben obgenanten herrn ayner nicht enwaer, ee si vntz gantz mit einander verrichten, dez Got nicht geb, so muegen di andern sechz ein andern an sein, stat nemen, wer in dar zue geuelt. Vnd der hat denn mit sampt den andern vollen gewalt ze sprechen vmb vnsern chrieg, alz oben geschriben stet. Vnd daz allez also staet vnd vnzebrochen beleib, geben wir in disen brief versigelten mit vnsern anhangunden insigeln. Datum dominica quasi modo geniti anno domini Mº. CCC. Quinquagesimo.

Source Fulltext: OÖUB 7 (Wien 1876), S. 178f., Nr. 176