Wir Albrecht von gottez gnaden hertzog ze O^esterreich, ze Steyr vnd ze Kernden tu^en chunt mit disem prief, daz wir vnserm getrewn Vlreich den O^echsel vnd Elblein dez Dunnen bruder vnsern purgern ze der Vreynstat di gnad getan habent, daz si in der capelln in dem spital ze der Vreynstat ein ewiger messe gestiften mügen mit der beschaidenhait, daz si dez pharrer daselbs ze der Vreynstat willen darzu^e gewinent vnd vmb die vier gu^eter ain hof am Pülhof, ain hof datz Lest, ain hueb datz Witzleinstorf vnd ain huben datz Schellenperch, die der vorgenant Vlreich O^echsel ze lehen von vns hat vnd die er zu der vorgenanten ewigen messe durch Got geben hat mit vnserm willen vnd gunst, daz wir die aigenschaft der selben güter auch durch Got vnd durch vnser vnd vnserer vordem sel willen zu der selben ewigen messe geben haben vnd wellen, swer die Vreinstat von vnsern wegen inn hat, daz der die selben gu^eter dem caplan, der da der vor genanten ewigen messe verweser ist, von vnsern wegen schirme. Dez geben wir zu vrchund disen prief versigelten mit vnserm insigel, der geben ist ze Wienn an phinzstag nach dem sunntag Misericordia domini nach Christes geburd drewzehen hundert jar darnach in dem funftzigsten jar.

Source Fulltext: OÖUB 7 (Wien 1876), S. 180, Nr. 178