Ich Reimprecht von Walseê von Ens vnd ich Alber von Rauhenstain vnd ich Hans der Tuers von Rauhenekk wir veriehen an disem prief vnd tuen chunt allen den, die disen prief sehent, horent oder lesent, die nu lebent vnd hernach chv^enftig sint, daz ain chrieg zwischen vnserm oheim Weycharten von Winchel wider vnserr muem wrawn Elspeten Choln wirttin von Seldenhouien gewesen ist vmb die gueter, die her nach geschriben stent: Gotfrislag, daz da leit auf dem Speysenperg, vnd vm all die gueter, die vm Durrental ligent pei dem Wagrein, vnd wacz dacz Wrawndorff auf v^eberlent vnd auf gestifften guet leit, vnd die mu^el dacz Wrawndorff vnd was zu den guetern allen geho^ert, denselben chrieg habent si an vns lazzen paidenthalben, was wir dar v^eber sprechen, da schullen sev pei peleiben. nu hab wir dar v^eber gesprochen, alle die gueter, di vor geschriben stent, daz dev schol inn haben vnd nu^eczen Choln wirttin von Seldenhouen vnuerchumert vncz an iren to^ed also peschaidenleich, wer daz, daz si erben gewunn, der schol daz gelt vnd die gueter sein, waer auer daz, daz si an erben verf/eer, so schullen die gueter Weycharten von Winchel vnd sein erben an geuallen mit vrchvnd dicz priefs. daz di red vnd die sache stet vnd vnd (sic) vnczeprochen peleib, dar v^eber gib ich Elspet Choln Wirttinn von Seldenhouen disen offen prieff czu ainer vestigung diser sache versiegelt mit meim anhangentem jnsigel vnd mit der erbern herren jnsigeln, die der sach spruchlevt gewesent sint. Der prief ist geben do man czalt von Christes gepu^erd drevczechenhvndert iar, dar nach in dem ain vnd funfczichistem iar an sand Gedrauten tag.

Source Fulltext: OÖUB 7 (Wien 1876), S. 238f., Nr. 233