Ich Ortolf der Pyber, zden zeiten purkraf ze Riedekk vnd mein hausfrow Elspet vnd vnser payder erben dy wir haben oder noch gewinnen, wir veriehen offenbar mit dem prief vnd tuenn chvnt allen den, dy den prief sehent oder lesen horent, dy nv lebent oder noch chumftig sint, daz wir mit wolbedachtem mvet vnd mit gvnst vnd gutem willen vnser pesten vrevnt vnd aller vnser erben recht vnd redleich geben haben ze chauffen dy zway glayt vnsers zehents, den wir gehabt haben pey dem Nevnmarkcht, Christan dem Gugelein purger in der Vreinstat, seiner hausfrown Elspeten vnd ir payder erben, vnd aus vnser gewer in ir gewer geantwurt zv rechten chaufftem vreym aygen mit allen den rechten vnd nvczen, vnd wir jn gehabt haben vnd dar zv gehort, besuecht vnd vnbesuecht, vmb hvndert phunt vnd vmb dreyzk phunt phenning wienner mvnss, der si vns gancz vnd gar gericht vnd gewert haben. Wir schullen auch dez selben zehents ir gewer sein an aller stat, wo in dez not geschiecht fur alle ansprach vnd fur allen chrieg, also aygens vnd lants recht ist in Osterreich, taet wir dez nicht, waz chriegs jn dar nach wuechs oder gieng von vns oder von vnsern nachchömen auf den egenanten zehend, oder wy er jn wurd ierr gemacht, waz si dez schaden nement, den selben schaden schullen wir jn abtu^on vnd schullen si daz haben auf vns vnd auf aller vnser hab, dy wir haben, besuecht vnd vnbesuecht, vnd wer vns mont mit dem prief, vnd der in innhat mit willen Christans vnd auch seiner erben, dem selben sey wir allez dez gepunden vnd schuldig, daz vorbeschriben ist, vnd auch alle dy recht an dem vorgenanten zehent, dy Christan oder sein erben daran haben, vnd daz dy red vnd dy handlung also staet vnd vnuerchert beleib, daruber zv vrchvnd vnd zv einem waren sichtigen zevg gib ich vorgenanter Ortolf der Pyber jn disen offen prief fur mich vnd fur all mein erben wolbesigelten vnd bestaett mit meinem anhangundem insigel, vnd zv einem zevg pezser sicherhait mit meines lieben pruder Gvndakchers dez Starhenwerger anhangundem insigel fur allen chvniftigen chrieg. Der prief ist geben nach Christes gepurd drewzehenhvndert dar nach in dem ain vnd fuinph-czkistem jar, dez mitichens nach sand Margreten tag.

Source Fulltext: OÖUB 7 (Wien 1876), S. 255f., Nr. 251