Wir Bu^erchert vnd Ott vnd Berichtolt vnd Bu^erchart pu^ercgrafen ze Maydbu^erch vnd grafen ze Hardek vnd vnser eriben wier veriehen vnd tu^en chunt allen den, die disen prief lesent oder ho^erent lesen, daz fu^er vns vnd fu^er erber herren vnd fu^er vnser man chomen her Chunrat von Tannberch an ainem tail vnd Vlreich von Haslawe vnd seine geswisterey hern Otten su^en von Ilaslawe, dem Got gnad, an dem andern tayl vmb den chrieg, den sev miteinander gehabt habent vmb daz halb haw^es ze Hasenekk, vnd waz lehen her Chunrat von Tannberch vngetailt inne gehabt hat, di zv dem selben halben haw^es geho^erent, daz erber herren vnd auch vnser man darumb gesprochen habent, daz her Chunrat von Tannberch daz selb halb haws vnd di vngetailten lehen in nucz vnd in gewer schol innhaben vnuerchummert vncz an seinen to^ed, vnd nach seinem to^ed so schol daz selb halbe haw^es ze Hasenekk vnd di vngetailten lehen, di darzu^e geho^erent, swie so di genant sind, eriben vnd geuallen auf den egenanten Vlreich von Haslawe vnd auf seinev geswisterey, den wier auch daz selb halb haw^es vnd die vngetailten lehen di darzu^e geho^ernt, ze rechtem lehen verlihen haben nach dez landes recht ze O^esterreich ze allem dem rechten, als vor geschriben stet, vnd darzv^e alle dev lehen, als sev der vorgenant her Ott von Haslawe ier vater von vns ze lehen gehabt hat. Vnd darvber so geben wier in diesen prief ze ainem warn vrchu^end diser sach versigilten mit vnsern anhangunden jnsigeln. Diser prief ist geben ze Wienne nach Christes gepu^erd dreuczehen hundert iar, darnach jn dem ains vnd fumfczkisten iar an sand Veyts abent.

Source Fulltext: OÖUB 7 (Wien 1876), S. 251f., Nr. 247