Ich Jans der Tu^ers von Rauchenekk vnd ich Katrey sein hausfraw wier vergehen offenbar an disem prief allen den, de in sehent oder horent oder lesent, de nu lebent oder her noch chunftich sind, daz wier mit wolbedachtem muet zw der zeit, do wier iz wol getuen mochten, vnd mit vnsers lehen herren hant vnsers genaedigen herren herczog Albrechts in Osterreich geben haben vnsern hof ze Pestarf, des fier lehen sind vnd des zway lehen vnser lehen sind gewesen von vnserm genadigen herren herczog Albrechts in Osterreich vnd de zway vnser rechtez aygen vnd allez, daz dor zwe gehort ze velde vnd ze darf, iz sey phenninggelt wismad holcz oder ekcher, iz sey westift oder vnwestift, versuecht oder vnuersuecht, wie so daz genant ist, vnserm aydem herrn Fridreichen von Winchel vnd seiner hawsfrawen vnserr tachter vrawn Annen ze rechter haymstewer fur dreu hundert phunt wienner phenning. wier haben in auch gewen vnsers rechten aygens dacz Zagel zwelif schilling phening gelts, de man all iar dient an sand Mychelstag, vnd auf der Staingrueb sechs schilling phenning gelts, de man all iar dient an sand Georigen tag, vnd dacz dem Garmans achzehn schilling phening gelts, de man all iar dient an sand Georigen tag vnd an sand Mychels tag, fur fierczk phunt wienner pha^ening, vnd de Garmansawe fuer sechczk phunt wienner phening, daz vor genant guet allez hab wier gewen ledichleich vnd vreyleich ze haben ze iern tagen, als landes recht ist vnd gewanhait in Osterreich, wer awer, daz seu an erben fuer fueren, des Got nicht engeb, so schol daz var genant guet nach iern tagen allez geuallen auf vnser nast vreunt, do iz ze recht auf erbet. Vnd dorvmb, so geh wier in disem (sic) prief versigelten mit meim var genants Jansen des Tuersen von Rauchenekk aygen jnsigel vnd mit des erbern herren jnsygel hern Albers von Rauchenstain vnd mit des erbern herren jnsigel hern Reimprechts von Pilichtorf, de diser sach gezeug sind mit iern jnsygeln. der prief ist geben nach Christ puerd dreuzehen hundert iar, dor noch in dem ainz vnd fumfczkisten iar des eritags an sand Lucein tag.

Source Fulltext: OÖUB 7 (Wien 1876), S. 270f., Nr. 265