Ich Weychart hern Chunrats svn von Polnhaim vnd alle mein erben veriehen vnd tun chunt mit disem offen brief allen den di in sehent oder horent lesen, daz wir vnsern tail an dem wald ze Polnhaim besucht vnd vnbesu^echt mit allen rechten eren vnd nutzen, als wir in vnd vnser vater seliger in nutz vnd in gewer in aygens geweiz von alter her praht haben, dem erbern herren hern Eberharten von Waltse vnd allen seinen erben recht vnd redleich ze chauffen haben geben also, daz wir Hainreichen den Schichken von Wels von vnsern wegen darzv^e haben genomen vnd allen gewalt dar zu^e geben, daz er vnseren tail an dem egenanten wald wegen vnd nach seinen triwen schatzen sol, so hat der ob genant her Eberhart von Waltse vnd sein erben auf iren tail hern Jacoben von Schonnawe dar zu geben vnd geschaft also, swi di zwen vnseren tail an dem egenanten wald achtend vnd schatzend, daz sol ainen slechten furganch haben vnd paidenthalben dabei beleiben an alles gever, vnd swaz dez selben geltes wirt, daz sol vns der egenant her Eberhart von Waltse vnd sein erben beraitz geben vnd vnuertzogenleich berichten. Vnd darvber zu ainem vrchund dez vorgeschriben chauffes geben wir in disen brief mit meinem anhangvnden jnsigel versigelt, der geben ist nach Christes gepurt drevtzehen hundert jar||
darnach in dem drev vnd fu^entzigstem jar dez svntags nach vnser frawen tag zder dienstzeit.

Source Fulltext: OÖUB 7 (Wien 1876), S. 297, Nr. 292