Ich graf Nichlas, graf Laurentz sun von Ma/^ertestorf, dem Got genade, vergich vnd tu^en chunt allen den, die disen brief lesent oder ho^erent lesen, die nu lebent vnd hernach chu^enftich sint, daz ich mit meiner erben gu^eten willen vnd gunst mit verdachtem mu^et vnd nach meiner pesten vreunt rat zu^e der zeit, do ich es wol getu^en mochte, verchauft han meines rechten aygens mein halbev veste ze Vestenburch vnd allez daz, daz zu/u der selben halben veste geho^eret in vrbar ze holtz ze velde vnd ze dorf, es sei gestift oder vngestift, versu^echt oder vnuersu^echt, swie so daz genant ist vnd swo so daz gelegen ist. Die selben veste halbev ze Vestenburch vnd alles daz, daz zu^e der halben veste gehoret als vor verschriben ist, han ich recht vnd redleich verchauft vnd geben mit alle den nu^etzen vnd rechten, als ich es alles vnd mein vodern in aygens gewer her pracht haben, vmb sechsthalbe hundert phunt wienner phenninge, der ich gar vnd gaentzleich gewert bin, meinem o^eheim kern V/elreichen von Pergawe vnd seinen erben fu^erbaz ledichleichen vnd vreyleichen ze haben vnd allen im frumen da mit ze schaffen verchauffen versetzen vnd geben, swein si wellen an allen irresal. Vnd sein auch wir ich obgenanter graf Nichlas vnd mein erben vnuerschaidenleich der vorgenanten halben veste ze Vestenburch vnd alles dez, daz zu^e der selben halben veste geho^eret, als vor an disem brief geschriben stet, des egenanten hern V/elreichs von Pergaw/^e vnd seiner erben recht gewern vnd scherm fu^er alle ansprach, als aygens recht ist vnd des landes recht ze Steyr. Waer aber, daz si mit recht an der selben halben veste vnd an alle dev vnd dar zu^e geho^eret, als vor verschriben ist, icht chrieges oder ansprach gewunnen, swaz si des schaden nement, daz suln wir in alles ausrichten vnd widerchern an allen im schaden. Vnd suln auch si daz haben auf vns vnd auf allem vnserm gu^et, swo wir daz haben, wir sein lebentich oder tode. Vnd daz diser chauf fu^erbaz also sta/^et vnd vnzerbrochen beleibe, dar v^eber so gib ich vorgenanter graf Nichlas meinem ohaim hern V/elreichen von Pergawe vnd seinen erben disen brief zu^e einem warn vrchu^ende vnd zu^e einer ewigen vestnung diser sache versigilt mit meinem jnsigil vnd mit meiner vreunde jnsigiln der erbern herren hern Merten des Stu^echssen von Trautmanstorf, hern Eberharts, hern Hainreichs der pru^eder von Walsse, hauptleut ze Drosendorf, hern Perichtolts von Pergawe, die diser sache gezeuge sint mit irn insigiln. Dieser prief ist geben ze Wienne nach Christes gebu^ert drewtzehen hundert iar, dar nach in dem drev vnd fu^emftzgisten jar an sant Jo^ergen tage.

Source Fulltext: OÖUB 7 (Wien 1876), S. 305f., Nr. 301