Ich Weychart hern Chunratz svn von Polnheim vnd alle mein erben veriehen vnd tun chunt mit disem offen brief allen den, di in ansehent oder ho^erent lesen, daz wir mit wolbedachtem mut ze der zeit, do wir ez wol getun mochten, allen vnsern tail an dem purchstal vnd an dem Wald ze Polnhaim besucht vnd vnbesucht mit allen rechten eren vnd nu^etzen, di darzu gehorent, als in vnser vater seliger vnd wir in aygens gewer vnangesprocheri von alter her haben pracht, dem edeln herren hern Eberharten von Waltse ze der zeit hauptman ob der Ens vnd allen seinen erben recht vnd redleich ze chauffen haben geben vmb f'umf vnd dreiczich pfunt pazzower pfenning, der wir gantz vnd gar bericht vnd schon gewert sein also, daz wir dhein ansprach nimmer mer darnach gehaben sullen, vnd sullen auch dez obgenanten purchstals vnd dez waldes ir gewer sein fur alle ansprach nach landes recht, wo in dez durft oder not geschicht. Taet wir dez nicht, swelhen schaden si dez naemen, den sullen wir in gentzleichen auzrichten vnd ablegen an allen schaden vnd sullen den haben auf vns vnd auf vnsern trewen vnd auf aller vnser hab, besucht vnd vnbesucht, swo wir di haben oder swo di gelegen ist. Vnd dar vber zu ainem waren vrchund geben wir in disen brief mit meinem anhangunden insigel versigelt vnd ze zeugnuzz dez vorgeschriben chauffes mit hern Jacobs insigel von Schonnawe vnd Dietreihes dez Ovens anhangunden insigeln, di ez durch vnserr pet willen in an schaden an disen brief habent geleit vnd gehangen. Der brief ist geben nach Christes gepurtt drevtzehen hundert jar, dar nach in dem drev vnd fvntzigstem jar des pfintztags vor sand Mathes tag.

Source Fulltext: OÖUB 7 (Wien 1876), S. 326, Nr. 320