Ich graf Nichlas der guniamaister vnd ich Elzbet sein hausurowe wir vergehen vnd tu^en chunt allen den, di disen brief lesent oder ho^erent lesen, di nu lebent vnd hernach chu^enftich sint, daz wir mit vnser erben gu^eten willen vnd gunst, mit verdachtem mu^et vnd mit gesampter hant zu^e der zeit, do wir es wol getu^en mochten, vnd nach vnser pesten vreunt rat verchauft haben vnsers rechten aygens vnsern halben tail die veste halbev ze Vestenburch vnd alles daz, daz zu^e dem selben vnserm halben tail geho^eret, aigen lehen purchrecht verlehentes gu^et in vrbar ze holtz ze velde vnd ze dorf walde vischwaide pauwe wismat, es sei gestift oder vngestift, versu^echt oder vnuersu^echt, swie so daz genant ist. Den selben vnsern halben tail an der veste ze Vestenburch vnd alles daz daz dar zu^e geho^eret als vor verschriben ist, haben wir recht vnd redleich verchauft vnd geben mit alle den nu^etzen vnd rechten, als es vnser vodern vnd auch wir in aygens gewer her pracht haben, vmb sechsthalb hundert phunt wienner phenninge, der wir gar vnd gaentzleich gewert sein, dem erbern herren hern V/elreichen von Pergawe vnd seinen erben fu^erbaz ledichleich vnd vreyleich ze haben vnd allen irn frumen damit ze schaffen verchauffen versetzen vnd geben, swem si wellen an allen irresal. Vnd zu^e einer pezzern sicherhait so setzen wir vns ich graf Nichlas der guniameister vnd ich Elzbet sein hausurowe vnd vnser erben vnuerschaidenleich v^eber die vorgenanten halben veste ze Vestenburch vnd v^eber alles daz daz darzu^e geho^eret, als es vor an disem brief benant ist, dem egenanten hern Vlreichen von Pergawe vnd seinen erben ze rechten gewern vnd scherm fu^er alle ansprach, als aygens recht ist vnd des landes recht ze Steyr. Waer aber, daz si mit recht an der selben halben veste ze Vestenburch vnd alle dev vnd darzu^e geho^eret, icht chrieges oder ansprach gewunnen, swaz si des schaden nement, daz suln wir in alles aus richten vnd widerchern an allen irn schaden, vnd suln auch si daz haben auf vns vnd auf allem vnserm gu^et, daz wir haben in den landen ze O^esterreich vnd ze Steyr, wir sein lebentich oder tode. Vnd daz diser chauf fu^erbaz also staet vnd vnzerbrochen beleibe, dar v^eber so geben wir ich graf Nichlas der guniamaister vnd ich Elzbet seine hausurowe hern Vlreichen von Pergawe vnd seinen erben disen brief zu^e einem warn v^erchunde vnd zu^e einer ewigen vestnunge diser sache versigelt mit vnserm insigil vnd mit graf Nychlas insigil, graf Laurentzes sun von Maertestorf vnd mit hern Perichtolts insigil von Pergawe vnd mit hern Merten insigil des Stu^echssen von Trautmanstorf di alle diser sache gezeuge sint mit irn insigiln. Diser brief ist geben ze Wienne nach Christes geburt drevtzehen hundert iar, dar nach in dem drev vnd fu^ernftzgisten jar an sant Michels tage.

Source Fulltext: OÖUB 7 (Wien 1876), S. 327ff., Nr. 322