Wir Leupolt von Gots genaden erwelt und bestetigt bischof ze Babenberg bechennen offenleich mit disem prif, daz wir gelichen haben und verleichen auch mit disem prif dem edeln mann unserm liebem getreun Eberhart von Waltsee hauptman ob der Ens und allen seinen erben, su^enen und tochtern daz gericht ze Slierpach vnd alle di gu^et, die er hat in dem selben gericht, die von uns und unserm gotzha-ws ze lechen gen, und haben auch im mit gutem willen erlaubt, ob er abgieng, dez Got lang nicht enwelle, daz er die selben lechen mag schaffen wem er wil, seinen erben su^enen oder tochtern, doch unschedleich uns und unserm gotzhaus an den selben unsern lechen. Mit urkund dicz prifs versigelt mit unserm insigel und geben ze Wels nach Crist gebu^ert dreutzechen hundert jar und in dem drew und funftzigsten jar an sand Jacobs tag.

Source Fulltext: OÖUB 7 (Wien 1876), S. 321, Nr. 315