Ich Perichtolt von Pergawe vnd mein erben vergehen vnd tu^en chunt allen den, die disen brief lesent oder ho^erent lesen, daz mein veter herr Vlreich von Pergawe mir geantwurt vnd gegeben hat hundert phuut vnd drev vnd achtzich phunt wienner phenning, da in mein herre der hochgeborn fu^erste hertzog Albrecht ze O^esterreich, ze Steyr vnd ze Chaernden zu^e geno^et hat vnd auch mit im geschaft hat, da ich Perchtolt von Pergawe vmb pu^ergel bin hintz den juden datz der Newenstat fu^er graf Nichlasen, graf Laurents sun von Maertestorf vnd die ich auch den juden datz der Newenstat geben sol an den briefen, da ich pu^ergel vmb bin fu^er den egenanten graf Nichlasen. Vnd dar v^eber so gibe ich im disen brief ze einem warn vrchu^ende diser sache versigelt mit meinem insigil vnd mit der erbern herren jnsigiln hern Eberharts vnd hern Hainreichs der pru^eder von Walsse, hauptlaeut ze Drosendorf vnd herrn Stephans von Hohenberch, die diser sache gezeuge sint mit irn insigiln. Diser prief ist geben ze Wienne nach Christes geburt dreutzehen hundert iar, dar nach in dem drev vnd fu^emftzgisten iar an sand Cholmans tage.

Source Fulltext: OÖUB 7 (Wien 1876), S. 329, Nr. 323