Ich O^ertel vnd ich Jo^estel die Hornnekker vnd vnser erben vergehen mit disem brief vnd tu^en chunt allen , die in sechent oder horent lesen, daz wier chaufft haben von vraw Gedrawten hern Offenn tochter von Arwerch vnsers prueder wirtinn hern Albrechtcz von Hornnekk auz der haimstewer, die si von vnserm prueder hat, dez da sind sibenczikch phunt geltcz vnd daz si schol haben ze aim leibgeding hincz an iren tod, auz dem selben leibgeding hab wier von ier chaufft fu^emf phunt geltcz, daz gelegen ist in dem marcht ze Pirichveld vnd vnder dem marcht an ainer mu^el vmb nevnczehen phunt wienner phenning, der wier sev gancz vnd gar gewert haben, also mit auzgenomner red, vnschadhaft der vorgenanten vrawn Gedrawten hern Offenn tochter von Arwerch an dem andern leibgeding, daz si von dez chauffes wegen chainn schaden nemen schol an dem andern leibgeding mit vrchund dicz priefs, vnd daz daz stet vnd vnczebrochen beleib, dar vber geb wier ir disen prief versigelten mit meinem dez egenanten O^ertleins des Hornnekker anhangvnden jnsigelen, vnd verpint ich mich egenanter Jo^estel vnder meins prueder O^ertleins insigel aller der gelu^eb gepunden sein, als var geschriben stet, wand ich zv der zeit nicht jnsigels gehabt han, ze ainem vrchund der warhait. Der prief ist geben nach Christes geburd dreuczehen hundert jar, dar nach in dem drev vnd fu^emfczgisten jar an sand Johanns tag ze svniwenten.

Source Fulltext: OÖUB 7 (Wien 1876), S. 316f., Nr. 310