Wir graf Chonradt von Schawnnberg verjechen offenlich mit dem brief vnd thun kund allen den, dj in sechent oder ho^ernt lesen, dj ytzn sind oder hernach ku^enfftig werdent, das wir mit wolbedachtem mut vnd mit aller vnser erben vnd besten frewndt ratt, gunst vnd guten willen zw der zeitt, do wir es wol gethu^en mochten, durich vnser vnd vnser vordern vnd nachkomen sell haill vnd sa^elden willen recht vnd redlich geschafft haben vnd schaffen auch mit disem brief, ob das wa^er, das yemant vnnser brief herfu^er zaigt mit vnserm insigl, da wir gu^elt an schuldig waren, dj selbigen hrief sullen vnnser vettern herr Lewtolt tumbrobst zw Freysing, Wernnhartl, Fridreich, Chunradt (?), Vlreich, Hainreich all brueder vnd vettern grauen zw Schawnberg vnd jr junger bru^oeder vnd vettern Wilhalm vnd Hanns grauen zw Schawnnberg ledigen vnd su^ellen das selb gelt selber richtig machen, das kain red fu^erwasser dauon aufste, dj vnser sel vnd eren v^ebel zu^em noch niemann kain schaden dauon aufste noch wachse. Wir schaffenn auch vnserm lieben brueder graf Hainreichen von Schawnnberg sand Johans orden ains vnd dreissig phunt wienner gult jn dem Newndorf ze Ortt, die er haben vnd niessen sol vnuerkumertt vnd vnuerstewrtt vntzt an seinen tod, vnd nach seinem tod sol es wider vallen auf vnnser vorgenant vettern von Schawnnberg vnd auf ir eriben. Es mu^egen auch vnnser vettern pflug vnd wagen darauf haben, als es mit gewonhaitt her ist komen. Wir schaffen auch vnserm vorgenanten brueder graf Hainreichen zwaintzig pfunt wienner phenning geltz, dj jm vnser ohaim von Meyssaw auf zaigen sullen, das er dj hab vnuerkumertt vnczt an seinen tod, vnd nach seinem tod sol es wider vallen auf sew vnd auf ir eriben. Auch schaffen wir mer vnserm ohaim Wernnharten von Meyssaw vnd seinem sun Hannsen vnd iren eriben vnnser dorf zw Lewtoltztal vnd waz darzw gehortt vnd was wir haben ze Pluemental allen jren frumen damit ze schaffen, wie in das aller pest fu^egt. Wir schaffen auch, das vnnser obgenant o^ehaim von Meyssaw vnsers vettern graf Hainreichs von Schawnnberg saligen tochter Kathrein, dj wir ytzw pey vnns haben, jn das kloster hincz sand Pernnhartt helffen su^ellenn, vnd sullen jr auszaigen drew pfunt wienner pfenning gu^elt, dj sy habe vnuerkumertt vntzt an jrenn tod. Wir schaffen auch von vnserm perkrecht zw Vttental ain vas weins zw zwain vnd XX. emeren gein Huntzhaim zu der kirichen alle jar ewigklich. Wir schaffen auch, was des v^ebrigen perckrechtz ist v^eber das vas wein, Du^erstlein vnd seiner hawsfrawnn, dj er ytzt hatt, vnd ir baiden kindern, allen jrenn frumen damit ze schaffen, wie in aller pest thunckt. Wir schaffen auch, das Durstel vnd sein hawsfraw vnd jre kind jr tochter Kathrein, dj bey meiner hawsfrawn ist, selb besta^etten sullen von dem vorgeschribem perckrecht. Auch schaffen wir vnserm getrewn Hartweigen dem Hainpecken vnd seiner hausfrawn Kathrein vnser klains haws ze Wienn, das wir gekawfft haben von ainem mann, hatt gehaissen der Hortt vnd von seinen eriben. Er sol auch von dem selbigen haws dienn alles, das davon recht ze dienn ist. Sy mu^egen auch mit demselbigen haws alles das schaffen vnd thu^en, das sv wellent. Darnach schaffen wir vnserm schreiber Hainreichen dem Sluder von Dorffen, der ytzw bei vnns ist, dj nagst gotsgabe, wie dj genant ist, dj vnsern vettern von Schawnberg aller nagst ledig wirtt, das sy im dj leichen sullen lautterlich zw goczwillen an alles verziechen vnd an alle widerred. Wir schaffen auch 1x phunt, dj vnser vettern von Schawnberg aufrichten sullenn, dreissig phunt hincz vnser frawn auf dj Stetten zw dem paw vnd xxx phunt alls wienner phenning zw dem paw zw den minnern brudern ze Wienn. Wir wollen vnd schaffen auch, wan Got v^eber vnns gepewtt, das man vnns dan besta^etten sol daczt den minnern brudern ze Wienn vor der dreier kunig altar vor dem sagra^er, den wir gewidemt haben. Auch schaffen wir, wan das ist, das Got v^eber vnns gepewtt, das vnns dan vnser vorgenant vettern von Schawnnberg vnd vnser ohaim von Meissaw zw der erd besta^ettn sollen dacz den mynern bru^eedern, als vor geschriben ist, als sy wissenn, das es vnns vnd in ain er sey, vnd was das gestett, das su^ellen sy gleich miteinander aufrichten vnd gelten. Wir schaffen vnsern weingartten ze Vngern, der gelegen ist dacz sannd Go^ergen bey dem se/or hincz den selbigen minnern brudern also, das man vnns alle jar ewigklich vnsern jartag da von begen sol mit gesungen vigilj vnd mit gesungen selambt. Vnd das dicz vorgeschribens gescha^efft alles sta^ett vnd vnczebrochen beleib, daru^eber zw ainem warn vrkund geben wir disen offen brief versiglten mit vnserm anhangunden insigl vnd mit vnsers lieben brueder graf Vlreichs von Pfanwerig marschalich in Osterreich vnd hawbtman jn Kernden, der dicz gescha^efftz zewg ist mit seinem insigl, der geben ist ze Ortt an sannd Pangraczen tag nach Kristj gepu^ertt drewzechenhundertt vnd darnach in dem drew vnd funftzigisten jarenn.

Source Fulltext: OÖUB 7 (Wien 1876), S. 309ff., Nr. 305