Ich Hninczel der Vrezzner vnd all mein erben veriehen offenleich an disem prief vnd tun chunt allen den, die in sehent horent oder lesent, daz wier dem edlem hern hern Fridreichen von Pettow marschalch in Steyer vnd sein erben verchauft haben ain hu^oben, di da gelegen ist in dem Prasink, vnd zwen acher vnd zwo wisen die ze Niderpirch gelegen sint, vnd den hof ze Rabensperch vnd ain halben weinczehenten, der an der Goricz pey Lemberch gelegen ist in des vorgenanten hern czehenten, mit allen den rechten, vnd wier daz vorgenant gu^et in gehabt haben, vnd allez daz, daz czu dem vorgenanten gu^et geho^ert, gesuchtz vnd vngesuchtz, wie daz genant ist oder wa ez gelegen ist, vm vier vnd zwainczichk march alter graczer phenning, der wier gar vnd genczleichen gewert sein, vnd schu^ellen im daz vorgenant gu^ot aufgeben vnd machen mit des hern hant, von dem ez ze lehen ist vnd der ez ze recht leihen schol. Auch schu^el wir in daz vorgenant gu^et scherm vnd vertreten vor aller ansprach nach landes recht, als man ze recht lehen scherm schol; tet wier des nicht, welhen schaden des der vorgenant her her Fridreich vnd sein erben nem, den ir ainz pey sein trewen gesagen mo^echt an ayd vnd an andrev pewaerung, den schu^el wier in gelten vnd ablegen gar vnd genczichleichen vnuerschidenleichen an allez geuerd vnd an chlag vnd an tayding, vnd schu^ellen daz haben auf vns vnd dacz vnsern trewen vud auf allen dem vnd wier haben. Vnd daz in disev gelu^eb stet vnd gancz vnd vnuerprochen peleib, darvber geb wier in disen offen prief versigelten ich vorgenanter Hainczel vnd mein erben mit des erbern man hern Chu^enrats czu den czeyten pharer zu der Nevnchirchen vnd mit Fridreichs des Tenichker anhangenden insigeln, die ez durch vnser pet willen an disen prief gelegt habent in an schaden vns ze ainem geczeugnu^ost vnd ze vrchunt der warhayt. Der prief ist geben nach Christes geburt tausend iar, dar nach in dem drey vnd fu^emfczichistem iar des nasten vreytages nach Gotes leychnam tag.

Source Fulltext: OÖUB 7 (Wien 1876), S. 311f., Nr. 306