Ich Vlreich der Schenkch von Seborn vnd meine hausfrow Kathrei vnd all vnser erben veriehen offenlich mit disem brif vnd tuen chuent allen den, di in sehent oder horent lesen, daz wir mit gesampter hant, mit guetem willen vnd auch nach vnsrer pesten freunt rat vnd mit meins sweher, hern Cristans von Johenstain guetleichen willen, vnsrew guet, der vierczechnew sind, di gelegen sind in der Apptay vnd di hernah geschriben stent, von erst ain guet ze Lanizmansperg, ain muel ze Oed, ain guet ze Chranwinchel, ain guet ze Oberdorf, drew guet ze Chuemring, ain guet ze Ortmansperg, ain guet ze Raphalzperg, ain guet ze Stierwerch, ain guet ze Pusling, ain guet ze Saularn, ain guet ze Hautzenperg vnd ain guet ze Champarn mit allen den rechten eren vnd nuetzen, die dar zue gehorent, besuecht vnd vnbesuecht als wir si selber inn haben gehabt, auz vnser nuetz vnd gwer in di seinen recht redleich vnd aygenleich als landes recht ist, ze chouffen haben geben vnserm liben herren bischof Gotfriden ze Pazzow vmb zway hundert pfunt pazzower phenning, der er vns genzlich gewert hat an allen vnsern schaden . . Wir verzeihen auch vns vnd ich Christan von Johenstain der guet mit dem brif also, daz wir furbaz noh niemant von vnsern wegen ewichleich nimmer mer nah den gueten dhainerlay recht noh ansprach sullen haben noh gewinnen weder mit recht noh an recht, noh mit dhainerlay sachen. Wir haben auch im mit vnsern trewen gelubt vnd verhaizzen, daz wir der guet sein scherm vnd sein gewer für allen chrieg vnd ansprach wellen sein an aller stat, vnd im des not ist, als des landes recht ist. Taeten wir des nicht, welherlay schaden er des nimt, den er gesprechen mag vngesworen vnd vnberecht, den sullen wir im allen abtun vnd widerchern ganz vnd gar an allen seinen schaden, vnd sol er daz haben auf vns vnd auf vnsern trewen, vnd darzu vnuerschaidenlich auf aller der hab, di wir vberal indert haben oder lazzen, wo di gelegen ist in Osterreich oder in Bayrn besucht vnd vnbesucht. vnd des selben schadens sol er von vns vnd von vnsrer hab bechomen, wi er wil vnd wi er mag, mit vnserm gütlichen willen vnd an allez recht. Wer di guet von vnsers herren wegen bischof Gotfrids von Pazzowe vnd mit seinem willen inn hat, vnd wer den brif auch mit seinem gutlichen willen inn hat, der hat alle di recht di oben an dem brif stent geschriben. Vnd daz in daz also stet ganz vnd vnzebrochen beleib, darvber haben wir im geben den brif besigelten mit meinem vorgenanten Vlreichs des Schenkchen vnd mit meins swehers Christans von Johenstain, Chunrats des Radegger, Ekkhartzs des Staynpekchen, zder zeit vnsers herren von Pazzowe marschalich, vnd Jansen des Hosmundes, zden zeiten mautter ze Pazzowe anhangunden insigeln, di der sach taidinger gewesen sind in vnd iren erben an allen schaden. Darvnder sich all vnser erben mit iren trewen verpinten an aydes stat allez daz stet zehaben vnd nimmer mer dawider nicht ze tuen, daz an dem brif ist verschriben, der geben ist ze Pazzowe nah Christ geburd dreutzehen hundert iar, darnah in dem drew vnd fümftzkistem jar an sand Merteins tag.

Source Fulltext: OÖUB 7 (Wien 1876), S. 332f., Nr. 325