Ich Dietreich von Hohenperch vergich vnd tu^en chunt allen den, die disen brief lesent oder ho^erent lesen, die nv lebent vnd hernach chu^enftich sint, daz ich mich des mit meinen trewen an aydes stat verlu^ebt vnd verbunden han gegen meinem pru^eder hern Stephan von Hohenberch vmb alles daz gu^et, daz vns anerstorben ist von vnserm vater hern Stephan von Hohenberch, dem Got genade, vnd daz vns auch noch angeuallen sol von vnser mu^eter, ez sei aigen lehen verlehentes gu^et purchrecht perchrecht in vrbar ze holtz ze velde vnd ze dorf, es sei gestift oder vngestift versu^echt oder vnuersu^echt, swie so daz genant ist, vnd vmb daz halb haus ze Wolfkerstorf vnd alles daz, daz darzu^e geho^eret, daz vns anerstorben ist von vnserm o^ehaim Offen von Slaet, dem auch Got genade, vnd swaz vns gu^etes von im anerstorben ist, es sei aygen lehen purchrecht perchrecht in vrbar ze holtz ze velde vnd ze dorf, es sei gestift oder vngestift, versu^echt oder vnuersu^echt, swie so daz genant ist, vnd es sei auch des vorgenanten gu^etes lehen von vnserm herren den hertzogen ze O7esterreich oder von dem pyscholf von Pazzaw oder von dem purgrafen von Nu^ernberch oder von swem es lehen ist, da wir ez ze lehen von haben, daz ich daz selbe gu^et alles, als es vor in disem brief benant ist, mit meinem pru^eder hern Stephan von Hohenberch vngetailt sol haben vntz an meinen tode. Vnd waer auch daz, daz ich Dietreich von Hohenberch sturbe vnd nicht su^ene hinder mir liezze, so sol denne daz vorgenant gu^et alles erben vnd geuallen auf den selben meinen pru^eder hern Stephan von Hohenberch vnd auf sein erben daz su^ene sint, vnd suln auch si denne meiner tochter, di ich alebenst (sic) han, da von geben tausent phunt wienner phenninge; ist aber, daz ich mer to^echter gewinne, wie vil der waer, den suln si denne davon gebunden sein ze geben drevtzehen hundert phvnt wienner phenninge vnd dar zu so suln auch mein to^echter vor aus haben alles daz gu^et, daz von irr mu^eter herchomen ist, swie so daz genant ist vnd swo so daz gelegen ist. Waer aber, daz mein pru^eder her Stephan von Hohenberch stu^erbe vnd nicht su^ene liezze, vnd daz daz vorgenant gu^et alles auf mich vnd auf mein su^ene geuiel, als ich auch besunderleich brief vnd insigel von im darv^eber han, vnd daz er denne mer to^echter biet denne zwo, so sol ich denne seinen to^echtern gepunden sein ze geben drevtzehen hvndert phvnt wienner phenninge zu^e irr mu^eter gu^et, daz si auch vor aus dar zu^e haben suln. Waer aber, daz er denne nur zwo tochter biet, so sol ich denne seinen to^echtern gebunden sein ze geben nur tausent phvnt wienner phenninge, ob daz ist, daz es ze schulden chv^emt, als vor verschriben ist. Waer aber, daz vnser ainer in recht ehaft not cha/^em, dev wizzenleich waer, der sol denne den andern seins tails des vorgenanten gutes anpieten vnd sol im daz denne ze chauffen geben nach zwayer manne rat — vnser vreunt. Wolt er es aber nicht chauffen, so sol der denne vnder vns baiden, der in ehaft not cho^emen ist, mit dem selben seinem tail gu^etes allen seinen frumen schaffen, als im daz aller peste wol chvm vnd fu^ege an allen irresal, als verre vnd als vil, daz er von ehaften no^eten chv^em. Waer aber, daz wir icht sto^ezze vnd auflaeu^ef gegen einander gewunnen, daz sol denne gesten an zwain, die wir aus den siben nemen, die irev insigil an disen brief gehangen habent, vnd swaz die selben zwen denne darv^eber sprechent, daz suln wir denne baidenthalben steet haben an allen chriege. Waer aber, daz wir baid su^ene liezzen, die suln denne auch bei allen den gelu^eben vnd pu^enten beleiben, der wir vns gegen ein arider verlu^ebt haben, als vor verschriben ist. Vnd daz disev sache fu^erbaz also staet vnd vnzerbrochen beleibe, darv^eber so gib ich in disen brief zu^e einem warn vrchu^ende diser sache versigilt mit meinem insigil vnd mit der erbern herren insigiln hern Vlreichs von Hauspach, hern Reymprechts des Tu^ersen, hern Jansen des Tu^ersen von Rauhenekke, hern Mauritz von Hauwenuelde, hern Chadolts von Ekchartsawe des Eltern, hern Jansen von Merswanch, Hadmars von Su^ennberch, di diser sache taydinger vnd verrichter gewesen sint vnd auch alle diser sache gezeug sint mit irn insigiln. Diser brief ist geben ze Wienne nach Christes geburt drevtzehen hundert iar, dar nach in dem drev vnd fu^emftzgisten iar an sant Symon vnd sant Judas tage.

Source Fulltext: OÖUB 7 (Wien 1876), S. 329ff., Nr. 324