Ich V/elreich der Polle vnd ich Anna seine hausurowe wir vergehen vnd tu^en chunt allen den, die disen brief lesent oder ho^erent lesen, die nu lebent vnd hernach chu^enftich sint, daz wir mit vnser erben gu^eten willen vnd gunst mit verdachtem mu^et vnd mit gesampter hant zu^e der zeit, do wir es wol getu^en mochten, vnd mit vnsers gruntherren hant hern Jansen, hern Weycharts sun bei den Minnern pru^edem verchauft haben vnser haus gelegen in der Pipingstrazze ze Wienne ze nahst Otten haus des Haitzer des fleischakcher, da man von dem egenanten vnserm haus alle iar dient hern Jansen pei den Minnern pru^edem zwaintzich wiener phenning ze gruntrecht vnd zway phunt wienner phenning ze purchrecht vnd nicht mer; vnd hat auch mir vorgenanten Annen mein vater her Orttolf mit der Petziehen daz selb haus ledichleich gechauft vmb sein aigenhafts varunt gu^et. Daz selb haus haben wir recht vnd redleich verchauft vnd geben mit alle den nutz vnd recht, als wir es in purkrechts gewer her pracht haben, vmb sibentzich phunt wienner phenning, der wir gar vnd gaentzleich gewert sein, dem erbern herren hern Perichtolden von Pergawe vnd seinen erben fu^erbaz ledichleich vnd vreileich ze haben vnd allen im frumen da mit ze schaffen verchauffen versetzen vnd geben, swem si wellen an allen irresal. Vnd sein auch wir ich V/elreich der Polle vnd ich Anna sein hausurowe vnd vnser erben vnuerschaidenleich des egenanten haus des vorgenanten erbern herren hern Perichtolts von Pergawe vnd seiner erben recht gewern vnd scherm fu^er alle ansprach, als purchrechts recht ist vnd der stat recht ze Wienne; waer aber, daz si fu^erbaz mit recht an dem vorgenanten haus icht chrieges oder ansprach gewunnen, swaz si des schaden nement, daz su^eln wir in alles aus richten vnd wider chern an allen irn schaden. Vnd su^eln auch si daz haben auf vns vnd auf allem vnserm gu^et, daz wir haben in dem lande ze O^esterreich, wir sein lebentich oder tode. Vnd daz diser chauf fu^erbaz also staet und vnzerbrochen beleibe, dar v^eber so geben wir in disen brief ze einem warn vrchu^ende vnd zu^e einer ewigen vestnunge diser sache versigilt mit vnserm jnsigil des vorgenanten hern Jansen bei den Minnern bru^edern vnd mit des vorgenanten hern Orttolfs jnsigel mit der petziehen vnd mit Stephans jnsigil des Pollen, mein vorgenanten V/elreichs pru^eder, die diser sache gezeuge sint mit irn jnsigiln. Diser brief ist geben ze Wienne nach Christes geburd dreutzehen hvndert iar, dar nach in dem vier vnd fu^emftzgisten iar an sand Mathyas tage des heiligen zwelifpotten.

Source Fulltext: OÖUB 7 (Wien 1876), S. 351f., Nr. 342