Wir Andre vnd Syghart ped prueder di Grueber vnd vnser paider eleichev hausvrawen vnd all vnser erben veriehen offenbar an dem brief vnd tu^en chunt allen den, di in an sechent oder horent lesen, di nu^e sind oder noch chu^enftich werdent, daz wir mit wol verdachtem vnd verayntem muet vnd nach rat vnd weysung erber la^ewt vnd vnser besten vreunt haben dem erbern vnd wolbeschaiden Hainreich von Emphing vnd seiner elleichen ha^eusvrawen vnd allen iren erben, di si yezund habent oder noch chu^enftichleich gewinnent, recht vnd redleich ze chaufen gegeben mit rechter fu^erzicht vnser vnd aller vnser erben vnser wys dacz Gryeking, die genant ist di Pru^ekhwis vnd gelegen in Waldarer pharre, mit alle den eren rechten vnd nu^etzen, di dar zu gehorent, versucht oder vnuersucht, vmb zwainczich phunt alter wyenner phenning, der wir gantz vnd gar gericht vnd gewert sein, also mit der beschaiden, ob yem her für cha^em, der pezzar erb wolt sein ze der vor geschriben wis, denn wir gewesen sein, vnd sew dar vmb anspra^ech mit dem rechten, so geben wier in auf der vor geschriben wys dreyzzich phunt alter wyener phening ze einem rechten satze nach dez landes recht ob der Enns, vnd sullen dann des chauffes oder des Satzes, swelhes si wellent, ir recht gewern sein fur all ansprach an aller der stat, vnd in des durft geschicht, nach des landes recht ob der Enns. Wa^er aber, daz wier in di gewerschaft indert verzugen, von welherlay sachen daz gescha^ech, waz si des schaden na^emen, den ier aynz angeva^er pei sein trewen an ayd vnd an allew recht gesprechen mag, den selben schaden sullen wir in allen ab tu^en vnd wider chern gantz vnd gar, vnd daz sullen si haben datz vnsern trewen vnd auf aller vnser hab, wo wir die versucht oder vnuersucht indert haben oder lazzen. Daz in daz allez sta^et vnd vnuerchert beleib, dar vber ze eynem waren vestem vnd statem vrchu^ende geben wir in den offenn brief versigelten mit vnsern aygen anhangenden insigeln vnd ze einer pezzarn sycherhait vnd gezeugnusse mit des erbern vnd wolbeschaiden hern Ekkhartz dez Stainpekchen ze den zeiten marschalichs dez pyscholfs von Pazzawe anhangenden insigel, daz er durch vnser pet willen dar an gehangen hat yem an schaden. Der brief ist geben nach Christi gepu^erd vber drewzehen hundert iar, dar nach in dem fumf vnd fu^emftzichisten iar an vnser vrawen tag ze der liechtmesse.

Source Fulltext: OÖUB 7 (Wien 1876), S. 400f., Nr. 389