Ich Reinprecht von Waltse von Ens vnd mein erben vnd ich Fridreich vnd ich Wolfgang vnd ich Hainrich prueder von Waltse von Ens sein vetern vnd vnser erben tv^en chu^ont mit disem prief allen den die in sehent lesent oder ho^ernt lesen, daz wir mit wolbedachtem muet nach vnser paider vreund vnd diener rat zder zeit do wir ez wol tv^en mo^echten, auzgetzaigt vnd getailt haben gen ein ander alles vnser vrbar vnd guet, daz wir zu der vestt vnd zu^e der grafschaft Waessenberg haben vnd geho^ert vnd daz vnser satz ist von vnserm gnedigen herren dem hochgepo^ern ffu^ersten dem herczogen von Osterreich, vnd ist mir vorgenanten Reinprecht von Waltse vnd meinen erben geuallen an ainem tail alles daz vrbar vnd die hu^eeb vnd die ho^ef mit sampt dem vrein, die zu Waessenberg geho^ernt an die nevn hoef die mit nam angetzogen vnd benant sint; darzu^e die dienstpfenning sint mir geuallen auf dem vrbar ze Waessenberg vnd der marcht ze Nevnchirchen; mir ist auch geuallen daz ampt im Weissenpach jm Wernhartzslag daz do^erf im Weizzenpach daz dorf am Scho^enekk. Mir ist auch geuallen der marchtte O^etenshaim mit dem gericht daselbs vnd swaz dar zu^e geho^ert, deu vorgenanten gueter alleu, ez sein maerchtt do^erffer gericht hueb oder ho^ef chlain oder gro^ez versu^echt vnd vnuersu^echt, swie daz genant ist, mit allen den rechten eren vnd nu^etzen, als vns die vnser amptla^eut emaln paidenthalben geuessent vnd ingenu^emen habent, also sint si mir vorgenanten Reinprecht von Waltse vnd meinen erben geuallen an aim tail. Da wider an dem andern tail ist mir vorgenanten Fridrich von Waltse vnd meinen pruedern vnd meinen erben geuallen Lonueld der marchtt vnd mautt vnd gericht vnd swaz do^erffer in das ampt vnd das gericht geho^ernt daselbs an das ampt im Weizzenpach vnd die gu^eter die mit worten sint auzgenu^emen, vns ist auch geuallen das dorf Scho^ennaw vnd Dietrichslag auf dem Melmekk auf der Longenpru^ekk daz dorf in der Stifftu^ong jm Slaeglein jn der Zaglawe, jm Ra^evt jm Weinzu^erl jn der Apnawe jm Raedinge an den Rossperch jm Weigleinslag jm Sybreinslag jm Pehaimslag jm Laimpach am Stern auf der Haid jm Amanslag jm Eberhartslag jm Gaisslag jm Anfu^esslag ; vns ist auch geuallen daz ampt in der Gengen vnd swaz dar zu^e geho^ert; vns sint auch geuallen auz dem vrbar ze Waessenberg nev^en ho^efe, der hofe ze Okolsteten der hof ze Greinhartsteten der hofe ze Winthag der hof ze Schulthartsteten der hofe ze Ettemdo^erf der hofe am Wege der hof am Chelchperch vnd daselbs ein hofe dient als vil als der hofe ze Chelchperch, der Ruefferho^efe auf dem perig. die vorgenanten gueter alleu, ez sein maercht do^erffer gericht ho^efe chlain oder gro^ez, versu^echt oder vnuersu^echt mit allen den rechten eren vnd nu^etzen, als vns die emaln vnser amptla^eut paidenthalben geuessent vnd ingenu^emen habent, also sind si mir vorgenanten Fridrich von Waltse vud meinen pru^edern vnd vnsern erben geuallen an dem andern tail. Darzu^e sei wir paidenthalben vberaincho^emen vmb alle die zehent so auf vnsern paidentailn gelegen sind, daz wir die nu^ezemal nicht getailn mo^echten vnd haben paidenthalben vnser amptla^eut darzu^e geschafft, daz sy die weil die zehent mit einander vessen vnd innemen sullen als lang, vntzen wir vns eruaren wie wir die mit einander tailn, daz ainem als recht geschech als dem andern. Wir sein auch paidenthalben vberainch^eomen vmb die vesst Waessenberg vnd daz lantgericht daz darzu geho^ert, daz vns paidenthalben ein pvrkraf vnd ein lantrichter da mit warten schullen geleich ainem tail als dem andern tail. Dann vmb alle fo^erst wiltpaen vogtay vnd vischwaid di sullen wir paidenthalben mit einander haben vnd waz nu^etz da von becho^emen mo^echten, daz sol gleich getailt werden aim tail recht als vil als dem andern tail. Dann waz paidenhalben vnser la^eut der holtzer vnd wayde emaln zu iren notdu^erfften gehabt habent, also schullen si ir notdu^erfft noch haben, dann vmb die vest O^etenshaim da sol vns vnser purkraf mit warttu^end sein recht ainem als dem andern vnd swaz auf die vorgenanten zwo vestt Waessenberch vnd Otenshaim gieng mit pu^erkhu^et mit pawe mit welhen sachen daz waer, daz sulle wir paidenthalben mit einander raihen vnd leiden recht ain tail als vil als dem andern tail. wir sein auch paidenthalben vberaincho^emen, ob daz waer das vns oder vnseren amptla^euten icht verswigen oder vergessen waer daz an vnser vrbar puech nicht cho^emen wa^er, waz wir oder vnser amptla^eut dez paidenthalben ervinden vnd eruaren mo^echten, daz schulle wir auch gleich mit einander tailen an alls geua^er. vnd daz die tailung vnd die sach fu^erbaz staet vnd vnuerchert beleib, dar vber so gib ich vorgenanter Reinprecht von Waltse vnd ich Fridrich vnd Hainrich von Waltse disen prief versigelt mit vnsern anhangenden jnsigelen, vnd zu^e einem zewg diser sach mit vnserr ritter vnd diener jnsiglen herrn Walthers von Sausenekk, hern Jacobs des Strahner, hern Cu^enrats von V/era, Chunrats des Schawerbekchen vnd Otten des Alma^er. Geben ze Otenshaim an sand Vlreichs tage, da man zalt von Christi gepu^erde drevtzehen hundert iar dar nach in dem sechs vnd ffumftzikisten jare.

Source Fulltext: OÖUB 7 (Wien 1876), S. 462ff., Nr. 457