Ich Reimprecht von Walsse von Ens vnd mein erben vnd ich Fridrich vnd ich Wolfgang vnd Hainreich von Walsse von Ens sein vettern vnd vnser erben tv^en chunt offenbar an dem prief allen den, di in ansehent oder ho^erent lesen, di lebent oder noch chv^enftig werdent, daz wir mit wolbedachtem mu^et nach vnser paider vrevnt vnd diener rat auzgezaigt vnd getailt gen einander haben allez vnser v^erbar vnd gv^et daz zu^e der Vreinstat geho^ert vnd daz vnser satz ist von vnserm genedigem herren dem hochgeporn fv^ersten dem hertzogen von O^esterreich, vnd ist mir vorgenanten Reimprecht von Walsse vnd meinen erben gevallen an einem tail der marcht ze Perg mit dem gerihtt daselbs vnd swaz darzv^e geho^ert; darzv^e ist mir auch gevallen der marcht ze dem Nevnmarchtt mit gerihtt mit all, vnd der marchtt Pregarten vnd Gu^etaw^e Vierling vnd Nvspavm Windischendorf Avrpach vnd Liechtenstain vnd swaz zv^e der pfleg vnd amptt ze dem Nevnmarchtt geho^ert. Die vorgenanten gv^eter alle, ez sein ma^ercht do^erffer gericht ho^ef chlain oder groz mit allen den rechten eren vnd nv^etzen, versu^echt vnd vnuersu^echt, alz die vormaln vnser richter vnd amptlevt vnz paidenthalben gevessent vnd ingenomen habent, also sind si mir vorgenantem Reimprecht von Walsse vnd meinen erben gevallen an einem tail. Dawider an dem anderm tail ist mir vorgenantem Fridrich von Walsse vnd meinen prv^edern gevallen der marchtt Ma^ethavsen mit dem gerihtt vnd mit dem vrvar vnd mit dem ma^ethavs vnd swaz darzv^e geho^ert, der marchtt ze Schenchenveld vnd die do^erffer Hierspach Grv^eb Vorwald Tyschperg Tyerperg Chv^engslag Herleinslag vnd swaz zv^e dem gerihtt vnd amptt ze Schenchenveld geho^ert, daz dorf Rainpach vnd daz dorf Aphalter vnd die zwen ho^ef Herslag vnd swaz zv^o dem amptt Rainpach geho^ert; daz dorf Zulv^ezzen vnd swaz zv^e dem selben ampt geho^ert, daz dorf Svmerawe vnd swaz zv^e dem selben dorff vnd amptt geho^ert, daz dorf Svnnberch vnd daz dorf Viertzehen vnd daz dorf Dreisten vnd daz dorf Lavpach vnd swaz zv^e dem amptt Svnnberch geho^ert, der marchtt Leopoltzslag daz dorf Ma^erteinslag vnd Zetwing, der hof vnd die mv^el Stikestorf vnd Hv^eltschen, Lv^etweinstorf Wolabitz Eysenhv^et Erlprukk vnd die Pramho^ef vnd swaz zv^e dem amptt vnd gerihtt ze Leopoltzslag geho^ert; darzv^e der O^edhof gelegen pei Perg vnd swaz dar zv^e geho^ert. Di vorgenanten gv^eter alle ez sein ma^erchtt do^erffer gerichtt ho^ef chlain oder groz mit allen den rechten eren vnd nv^etzen, versv^echt vnd vnuersv^echt, alz die vnser richter vnd amptlev^et vnz paidenthalben vormaln gevessent vnd ingenomen habent, also sind si mir vorgenantem Fridreichen von Walsse vnd meinen prv^edern vnd vnsern erben gevallen an dem andern tayl. Darzv^e sei wir paidenthalben v^eberaincho^emen vmb all di zehent so auf vnsern payden tailn gelegen sind, daz wir die nvzemal niht getaylen mochten vnd haben paidenthalben vnser amptlev^et darzv^e geschaffet, daz si dieweil die zehent mit einander vessen vnd innemmen schv^ellen alz lang, vntzen wir vns ervarn wie wir die mit einander tailen daz einem alz rehtt geschech alz dem andern. Dann vmb die Vrein so zv^e der Vreinstat geho^erent, die chund wir ze diser zeit niht getailen vnd haben paidenthalben mit vnsern amptlevten geschafft, daz si all nu^etzz vnd dinst mit einander vessen vnd innemmen schv^ellen so lang, vntz wir vnz auch ervarn mu^egen daz wir die mit einander taylen, daz einem alz rehtt geschech alz dem andern. Wir sein auch paidenthalben v^eberaincho^emen vmb die stat ze der Vreinstat vnd daz lantgerihtt daz darzv^e geho^ert vnd daz statgerihtt vnd mavt vnd die pv^erger daselbs, daz wir die mit einander haben schullen. Vnd schol vnser lantrichter vnd vnser statrichter vnd die pv^erger mit der vestt vnd mit der stat vnd mit dem lantgericht vnd statgerichtt vnd mavtt mit allen dinsten eren vnd nu^etzzen geleich warttund sein paidenthalben, daz einem tayl alz rehtt geschech alz dem andern tail. Wir sein auch paidenthalben v^eberaincho^emen vmb die ayndlef lu^ezz die in dem pv^erchveld ze der Vreinstat gelegen sind vnd vmb die drei ga^ertten vnd vmb die nevntzehen tagwerch wismades daz vns besunderleich an geho^ert, vnd vmb die zehen tagwerch wismades auf der Trevay vnd zwai tagwerch ze Pirha^ech vnd ein tagwerch in der Levting daz zu^e der Vreinstat geho^ert, daz daz paideuthalben vnser amptlevt vezzen vnd taylen schv^ellen an geva^er, daz einem tayl alz rehtt geschech alz dem andern. Dann vmb die vestt Chlingwerch vnd swaz darzv^e geho^ert sei wir paidenthalben v^eberaincho^emen, daz daz ein pv^erkgraf von vnz innhaben schol vnd schol damit an gewa^er warttvnd sein einem tayl rehtt alz dem andern tayl, vnd swaz nu^etzz von stevren oder von wev daz wa^er davon gevallen mo^ehten, die schol vnz vnser purkgraf paidenthalben rayhen einem tayl alz vil alz dem andern tayl. Wir sein auch paidenthalben u^eberaincho^emen, ob daz wa^er daz vnsern amptlevten icht verswigen wa^er oder vergezzen wa^er daz an vnser v^erbarpv^ech niht chom/een wa^er, waz wir oder vnser amptlevt dez paidenthalben ervinden vnd ervaren mo^ehtten, daz schv^ell wir auch geleich mit einander taylen. Vnd daz die taylung vnd die sachh fv^erbaz also sta^et vnd vnzebrochen beleib, dorv^eber gib ich vorgenanter Reimprecht von Walsse vnd ich Fridreich von Walsse vnd ich Heinreich von Walsse disen offen brief versigelt mit vnsern anhangunden jnsigeln, vnd ze einem zevg mit vnser ritter vnd diner jnsigel hern Walthers von So^ewsenekk hern Jacobs dez Strahner hern Chunrats von V/era Chv^enrats dez Schevrlechner vnd V/elreich dez Du^erren, di vnser sachh zevg sind mit iren anhangunden jnsigeln. Der brief ist geben nach Christz gepv^ertt v^eber drevzehen hvndert jar dar nach in dem sechs vnd fv^enftzgistem jar an sand Peters vnd sand Pavls tag.

Source Fulltext: OÖUB 7 (Wien 1876), S. 460ff., Nr. 456