Wir Albrecht von Gotes genaden herczog ze O^essterreich ze Steir ze Kernden vnd ze Krain enbieten vnssern getrewn dem richtter vnd dem rat vnd den purigern ze Enns vnnsser gnad vnd alles gut, wand wir nicht wellen daz zwischen ew vnd vnssern getrewn den purigern von Steir dhain stoss oder vnvrewnschafft sey, vnd daz ir bei ewrn allten rechten vnd gu^eten gwonhaiten, vnd auch di von Steir bei irn brieffen beleiben, so main wir vnd wellen, wenn ir zymerholcz oder brennholcz des ir selb wedu^erffet, dacz Steir chawffen wellet, daz ir daz tun schult mit irm wellen, vnd des sullent sy ew gvnnen an irrung, vnd haben in auch dasselb geschriben vnd auch vnsserm getrewn lieben Fridreichen von Walsse von Enns vnd Janssen dem Schecken purcgraff ze Steir enboten, das sy ew paidenthalben darczu halden sullen von vnssern wegen, daz ir daz also tut, vnd auch mit einander wol vnd gutleich lebet, geben ze Wienn an sand Vlreichs tag anno domini M ccc L sexto.

Source Fulltext: OÖUB 7 (Wien 1876), S. 465, Nr. 458