ICH Atakcher von Ra/^r vnd ich Katrei sein havsvro/^w vnd vnser paider erben wier vergehen vnd tu^en chunt offenleichen allen lew/^ten mit dem prief, daz wir verchawft haben ain weingarten der gelegen ist dacz Vihofen vnd ist perchrecht von dem erbern herren hern Renprechten von Walse vnd dient alle jar ein emmer wein ze Vihofen ze perchrecht vnd nicht mer. Den vargenanten weingarten haben wier verchavft vmb sechs phunt wienner phenning, der wir gancz vnd gar gewert sein, dem goczhavs dacz sand Polten probst Dietmarn hern Ruegern zv den zeiten techant vnd Vlreichen dem Veyrtager zv den zeiten guster; vnd schullen auch furbaz allen iern frum damit schaffen mit versetzen mit verchavffen geben, wem sev wellen an allen iersal, nemen sev dar an icht schaden mit recht, daz schullen sev haben auf mier vnd auf mein erben vnd auf alle dem guet daz ich hab in dem land ze Osterreich, wier sein lebentig oder tod. Vnd darvber gib ich vorgenanter Atakcher von Rar in den prief versigelten mit meim anhangunden insigl vnd mit dez erbern herren insigl hern Reinprechten von Walse der dez weingarten perchherre ist, vnd mit meins prueder insigl hern Christans von Rar des iungen. Der prief ist geben dacz sand Polten, da von Christes gepo^erd ergangen waren drevczehen hundert jar dar nach in dem sechs vnd fumftzigistem iar an sand Philips vnd sand Jacobs tag.

Source Fulltext: OÖUB 7 (Wien 1876), S. 450, Nr. 445