Ich Pilgreim von Tannberch vnd ich Gvndacher von Tannberch vnd alle vnser erben veriehen offenbar an dem prief allen den, die in sechent oder ho^erent lesen, daz wir mit wolbedachtem mvet vnd nach rat vnd gvnst vnser paider vrevnt verwechselt haben vnserev gvet dacz Wurmprant mit allen nv^eczen vnd rechten vnd czehent die darczve geho^erent, versu^echt vnd vnversu^echt wie die gnant sint, die auch lechen sint gewesen von meinem herren dem pyscholf vnd von seinem gotzhavs cze Pazzaw, vnser vrawen vnd irem convent dacz sand Marein Slag vnd auch mein herre von Pazzaw pyscholf Gotfrid cze den selben czeiten vnser vrawen czv dem vorgnanten chloster sein lechenschafft auf den vorgnanten gv^eeten cze Wurmprant geaygent hat. Dawider hat vns der probst Janns cze den czeiten vnd sein convent dacz send Marein Slag einen widerwechsel geben von irem chloster, den hof dacz Melben vnd ain gvet dacz Herhag gelegen innerhalb der Paenholcz mit allen den nv^oczen vnd rechten die auch daczve geho^erent wie die gnant sint, vnd den czehent dacz Vevchtenpach versucht vnd vnuersuecht, paidenthalben an allez geber, vnd sint der vorgeschriben sache dez widerwechsels czevg her Chadolt von Valchenstain cze den czeiten lantrichter ze Velden vnd der erber ritter her Ekhart der Stainpech cze den czeiten avch marschalich meines herren von Pazzaw vnd besunder ander pidber genu^ech, (sic) vnd sein auch der gevt (sic) dacz Wurmprant vnd dez cehentz ir geweren als landez recht ist in O^esterreich wo in dez not geschiecht dacz vnser vrawen chloster dacz sand Marein Slag vnd da selbst dem probst vnd seinem convent. vnd daz in daz staet bleib, darv^ober gib ich Pilgreim von Tannberch disen prief cze ainem waren v^erchv^ende versigelt mit meinem anhangvnden jnsigel vnd mit hern Chadolts von Valchenstain anhangvnden jnsigel vnd mit hern Ekhartz dez Stainpechen anhangvnden jnsigel. Darvnder verpind ich mich egnanter Gvndacher von Tannberch vnder den vorgnanten anhangvnden jnsigel wanne ich cze den selben czeiten aigens jnsigels nicht gehabt han. Der prief ist geben nach Christ pvrt drevczenhvndert iar darnach in dem sechs vnd fu^enfczigsten iar an send Philips vnd Jacobs tag.

Source Fulltext: OÖUB 7 (Wien 1876), S. 450f., Nr. 446