Wir graf Wernhart vnd graf Fridreich brüder von Schownberch bechennen offenleich mit disem brif, daz ettleich chrieg vnd stözz gewesen sind zwischen dem erwirdigen herren hern Gotfrid bischof ze Pazzow an einem tail, vnd vns an dem andern tail, vmb daz jait vnd vmb di schanchung ze Wesen vnd vmb di zwo chirichen Taufchirichen vnd Chalheim. di selben chrieg vnd stözz habent di edeln ersamen her Vlreich von Chappell vnd her Fridreich von Praitenekk zwischen vns paidenthalben frevntleichen bestellet also, daz wir die vorgenanten chirichen unbeswert sullen lazzen vnd sullen auch den vorgenanten herren hern Gotfrid bischof ze Pazzow an dem jait vnd an der schenchung nichts irren zu seinen lebtagen, vnuertzigen nah seinem tod seiner nahchomen vnd seines gotshaus ze Pazzow rechten, vnd auch vnuertzigen vnserr vnd aller vnser eriben vnd des gerichts rechten, vnd darvber ze vrchund geben wir disen brif versigelten mit vnsern anhangunden jnsigeln. Der ist geben ze Euerdinn an montag nah dem sunntag jubilate nah Christs gepurd dreuzehen hundert jar dar nah in dem sechs vnd fu^emftzgistem jar.

Source Fulltext: OÖUB 7 (Wien 1876), S. 453, Nr. 448